തിരുവനന്തപുരം: എസ്.ബി.ഐ മാനേജ്‌മെന്റിന്റെ തൊഴിലാളി ദ്രോഹ നടപടികള്‍ക്കെതിരേ നടക്കുന്ന സമരത്തില്‍ എസ്.ബി.ഐ ജീവനക്കാര്‍ ഒറ്റക്കാവില്ലെന്നും കേരളത്തിലെ സംഘടിത തൊഴിലാളിവര്‍ഗം അവരുടെ കൂടെ അണിനിരക്കുമെന്നും സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. ഓള്‍ ഇന്ത്യാ എസ്.ബി.ഐ എംപ്ലോയിസ് അസോസിയേഷന്‍ തലസ്ഥാനത്തു നടത്തുന്ന സമരത്തെ അഭിവാദ്യം ചെയ്തു സംസാരിക്കുകയായിരുന്നു അദ്ദേഹം.
കേരളത്തിലെ ട്രേഡ് യൂണിയന്‍ പ്രസ്ഥാനങ്ങളുടെ ചരിത്രം കൂടി കണക്കിലെടുത്ത് മാനേജ്‌മെന്റ് അവരുടെ നിലപാടുകളില്‍ നിന്ന് പിന്നോട്ട് പോകാന്‍ തയാറകണം. ബാങ്കുകള്‍ സ്റ്റേറ്റ് ബാങ്ക് ഓഫ് ഇന്ത്യയില്‍ ലയിച്ചതോടെ സര്‍വീസ് ചാര്‍ജുകള്‍ ക്രമാതീതമായ വര്‍ധിച്ചു. ഒരു ജനകീയ ബാങ്ക് വേണമെന്ന് വാദിക്കുന്ന സംഘടനയെന്ന എന്ന നിലയില്‍ ഉപഭോക്താക്കളുടെ താല്‍പര്യവും സംരക്ഷിക്കേണ്ടണ്ടത് ട്രേഡ് യൂണിയന്റെ ആവശ്യമാണെന്നും അദ്ദേഹം പറഞ്ഞു.
തൊഴിലാളിദ്രോഹ നടപടികള്‍ അവസാനിപ്പിക്കുക, അന്യായമായ സ്ഥലം മാറ്റങ്ങള്‍ റദ്ദാക്കുക, ജീവനക്കാരോടുള്ള വിവേചനം അവസാനിപ്പിക്കുക, സ്ഥല മാറ്റങ്ങള്‍ക്ക് സുതാര്യമായ മാനദണ്ഡങ്ങള്‍ പാലിക്കുക, ട്രേഡ് യൂണിയന്‍ അവകാശങ്ങള്‍ അംഗീകരിക്കുക, ബാങ്കിടപാടുകള്‍ കസ്റ്റമര്‍ സൗഹൃദമാക്കുക, ജനകീയ ബാങ്കിങ് സേവനങ്ങള്‍ തുടരുക, അന്യായമായ സേവനനിരക്കുകള്‍ പിന്‍വലിക്കുക, ശാഖകള്‍ അടച്ചുപൂട്ടരുത് എന്നീ ആവശ്യങ്ങള്‍ ഉന്നയിച്ചാണ് സമരം.