ഒറ്റപ്പാലം : ഓപ്പറേഷന്‍ അനന്ത ഒറ്റപ്പാലത്തിന്റെ മുഖഛായ തന്നെ മാറ്റുന്നു. റവന്യൂ വകുപ്പ് പൊളിക്കല്‍ നടപടികള്‍ തുടങ്ങും മുമ്പെ ഉടമകള്‍ തന്നെ കെട്ടിടങ്ങള്‍ പൊളിച്ചു മാറ്റുന്നതാണ് ഒറ്റപ്പാലത്തിന്റെ മുഖഛായ തന്നെ മാറ്റുന്നത്. ടി ബി റോഡ് ജംഗ്ഷനില്‍ നൂറിലേറെ വര്‍ഷം പഴക്കമുള്ള കെട്ടിടമാണ് ഇപ്പോള്‍ പൊളിച്ചു മാറ്റുന്നത്. ഈ കെട്ടിടത്തില്‍ പ്രവര്‍ത്തിച്ചു കൊണ്ടിരുന്ന കടകളെല്ലാം മറ്റു കെട്ടിടങ്ങളിലേക്ക് മാറി. നഗരത്തില്‍ ഏറ്റവും കൂടുതല്‍ ഗതാഗത കുരുക്കു ഉണ്ടാവുന്ന സ്ഥലം കൂടിയാണ് ടി ബി റോഡ് ജംഗ്ഷന്‍. റോഡരികിലേക്ക് തള്ളി നില്‍ക്കുന്ന കെട്ടിടം പൊളിച്ചു മാറ്റപ്പെടുന്നതോടെ ഇവിടെ റോഡിന് വീതി കൂട്ടാനാവും. അതെ സമയം ഈ പ്രദേശത്ത് തന്നെയുള്ള ചില വ്യാപാരികള്‍ കടമുറികള്‍ പൊളിച്ചു നീക്കുന്നതിനെതിരെ ഹൈക്കോടതിയില്‍ നിന്ന് താല്‍ക്കാലിക സ്‌റ്റേ വാങ്ങിയിട്ടുണ്ട്. നഗരത്തിലെ ഗതാഗതക്കുരുക്കിന് പരിഹാരമെന്നോണം ന്യൂബസാര്‍ മുതല്‍ തെന്നടി ബസാര്‍ വരെയാണ് ഓപ്പറേഷന്‍ അനന്ത നടപ്പിലാക്കുന്നത്. ടിബി റോഡ് കവലയില്‍ 22 സ്ഥാപനങ്ങള്‍ പ്രവര്‍ത്തിക്കുന്ന കെട്ടിടം പൊളിച്ചുനീക്കിയാണ് ഒറ്റപ്പാലത്ത് ഓപ്പറേഷന്‍ അനന്ത കഴിഞ്ഞ ആഴ്ച്ച തുടങ്ങിയത്.
റവന്യൂ നടപടികളോട് സഹകരിക്കുന്ന വ്യാപാരികള്‍ സ്വമേധയാ കെട്ടിടങ്ങള്‍ പൊളിച്ചുനീക്കുകയാണ് ആദ്യഘട്ടത്തില്‍. റോഡ് വശത്തേക്ക് ഇറക്കിയിരിക്കുന്ന മറ്റ് പതിനാല് സ്ഥാപനങ്ങളുടെ നിര്‍മാണങ്ങളും പത്തുദിവസത്തിനുളളില്‍ ഒഴിപ്പിക്കും. നഗരത്തില്‍ വര്‍ഷങ്ങള്‍ക്ക് മുന്‍പ് ഉപാധികളോടെ അനുവദിച്ച പട്ടയങ്ങളുളള ഭാഗങ്ങളിലെ കെട്ടിടങ്ങള്‍ പൊളിച്ചു നീക്കി 23 സെന്റ് സ്ഥലമാണ് നഗരവികസനത്തിനായി മാറ്റുന്നത്.