കൊണ്ടോട്ടി: ലോറിയിടിച്ചു റോഡരികില്‍ അബോധാവസ്ഥയില്‍ കിടന്ന ബൈക്ക് യാത്രികനായ യുവാവിനു ടി.വി ഇബ്രാഹീം എം.എല്‍.എ രക്ഷകനായി. പാലക്കാട്-കോഴിക്കോട് ദേശീയപാതയില്‍ മൊറയൂരിനും പോത്തുവെട്ടിപ്പാറക്കുമിടയിലായിരുന്നു സംഭവം.
വഴിക്കടവ് അടങ്ങുംപുറം അമീന്‍ അഹ്‌സനാ (23) ണ് എം.എല്‍.എയുടെ അവസരോചിത ഇടപെടല്‍ തുണയായത്. ഇലക്ട്രീഷ്യനായ അമീന്‍ അഹ്‌സന്‍ വഴിക്കടവില്‍നിന്നു കൊണ്ടോട്ടിയിലേക്കു പോകുമ്പോഴാണ് ലോറിയിടിച്ചത്. ഇടിയുടെ ആഘാതത്തില്‍ തെറിച്ചു റോഡരികിലെ കുറ്റിക്കാട്ടിലേക്കു വീണ അമീനെ കണ്ടില്ലെന്നു നടിച്ചു പലരും കടന്നുപോയി. ചിലര്‍ ആശുപത്രിയിലേക്കു കൊണ്ടുപോകാനായി പിറകേവന്ന വാഹനങ്ങള്‍ക്കു കൈകാണിച്ചപ്പേള്‍ നിര്‍ത്തിയതുമില്ല.
ഏറെ നേരം കഴിഞ്ഞാണ് എം.എല്‍.എ ഇതുവഴിയെത്തിയത്. വാഹനം നിര്‍ത്തിയ അദ്ദേഹം, അമീനെ കൊണ്ടോട്ടിയിലെ സ്വകാര്യ ആശുപത്രിയിലേക്കു കൊണ്ടുപോകുകയായിരുന്നു. യുവാവിനു ബോധം തിരിച്ചുകിട്ടിയതോടെ കുടുംബത്തെ വിവരമറിയിക്കുകയും ചെയ്തു. സുഹൃത്തുക്കളും ബന്ധുക്കളും ആശുപത്രിയിലെത്തിയ ശേഷമാണ് എം.എല്‍.എ തിരികെപ്പോയത്. അപകടം വരുത്തിയ ലോറി പിന്നീട് കൊട്ടുക്കരയില്‍വച്ചു പിടികൂടി. തോളെല്ലിനു പരുക്കേറ്റ അമീന്‍ ചികിത്സയിലാണ്.