തിരുവനന്തപുരം: ഹൈക്കോടതി ഉത്തരവിന്റെ പശ്ചാത്തലത്തില്‍ കെ.എസ്.ആര്‍.ടി.സിയിലെ എം.പാനലുകാരെ പിരിച്ചുവിടുന്നതിനുള്ള നടപടികള്‍ തുടങ്ങി. പത്തു വര്‍ഷത്തില്‍ താഴെമാത്രം സര്‍വിസുള്ള കണ്ടക്ടര്‍മാരുടെ പിരിച്ചുവിടല്‍ ഇന്നു മുതല്‍ ആരംഭിക്കും. ഇന്നു ജോലിക്കെത്തുന്നവര്‍ക്ക് പ്രത്യേക അറിയിപ്പു നല്‍കിയാകും പിരിച്ചുവിടുന്നത്. ഇത് കെ.എസ്.ആര്‍.ടി.സിയുടെ സര്‍വിസുകളെ സാരമായി ബാധിക്കും.
പി.എസ്.സിയുടെ ലിസ്റ്റില്‍നിന്നു പകരം ജീവനക്കാരെ ഉടന്‍ നിയമിക്കാനാണ് തീരുമാനമെങ്കിലും ഇവര്‍ ജോലിയില്‍ പ്രവേശിക്കുന്ന ദിവസം തന്നെ കണ്ടക്ടര്‍മാരായി നിയോഗിക്കാന്‍ കഴിയില്ലെന്ന സാഹചര്യമുണ്ട്. ഒരാഴ്ചയെങ്കിലും പരിശീലനം ഇല്ലാതെ പുതിയ ആളുകളെ ബസുകളില്‍ നിയോഗിക്കുന്നത് ഗുണത്തെക്കാളേറെ ദോഷമുണ്ടാക്കുമെന്നാണ് കെ.എസ്.ആര്‍.ടി.സിയുടെ വിലയിരുത്തല്‍.
മാത്രമല്ല, പി.എസ്.സി ലിസ്റ്റില്‍നിന്നു അഡൈ്വസ് ചെയ്തിരിക്കുന്നവരില്‍ എത്രപേര്‍ ജോലിയില്‍ പ്രവേശിക്കാന്‍ എത്തുമെന്ന കാര്യത്തിലും സംശയമുണ്ട്. സാമ്പത്തിക പ്രതിസന്ധി കാരണം പി.എസ്.സി എം.പാനലുകാരായാണ് പുതിയ കണ്ടക്ടര്‍മാരെ നിയമിക്കുന്നത്. ഇതും കൂടുതല്‍പേര്‍ ജോലിക്കെത്തുന്നതിനു തടസമാകുമെന്നാണ് കണക്കുകൂട്ടല്‍.
ഒന്‍പതിനായിരത്തിലധികം വരുന്ന എം.പാനല്‍ ജീവനക്കാരില്‍ 3,861 കണ്ടക്ടര്‍മാരെയാണ് കോടതി ഉത്തരവിനെത്തുടര്‍ന്ന് പിരിച്ചുവിട്ട് പി.എസ്.സി പട്ടികയില്‍നിന്ന് പകരം നിയമനം നടത്തുന്നത്. എം.പാനല്‍ ജീവനക്കാരെ പിരിച്ചു വിടാനുള്ള ഉത്തരവ് നടപ്പാക്കാന്‍ സാവകാശം തേടിയുള്ള കെ.എസ്.ആര്‍.ടി.സിയുടെ ഹരജിയും കോടതി കഴിഞ്ഞദിവസം തള്ളിയിരുന്നു.
ഇവരെ പിരിച്ചുവിടുന്നതിനു പകരമായി പി.എസ്.സിയുടെ അഡൈ്വസ് മെമ്മോ കിട്ടിയ 4,051 ഉദ്യോഗാര്‍ഥികളെയാണ് നിയമിക്കേണ്ടത്. സാമ്പത്തിക പ്രതിസന്ധി ഉഴലുന്ന കെ.എസ്.ആര്‍.ടി.സിക്ക് ഇത് ഇരട്ടി ഭാരമാകും.