കൊച്ചി: ജയിലില്‍ കഴിയുന്ന നടന്‍ ദിലീപിന് പിന്തുണയുമായി സിനിമാ മേഖലയില്‍ നിന്ന് കൂടുതല്‍പേര്‍ രംഗത്ത്.
കമ്മട്ടിപ്പാടം എന്ന സിനിമയിലൂടെ ശ്രദ്ധേയമായ നടന്‍ അനില്‍, സംവിധായകന്‍ സജീവന്‍ അന്തിക്കാട്, നിര്‍മാതാവ് സുരേഷ് കുമാര്‍ എന്നിവരാണ് ഏറ്റവുമൊടുവില്‍ ദീലീപിന് പിന്തുണയുമായി രംഗത്തെത്തിയിരിക്കുന്നത്.
കഴുതപ്പുലികള്‍ക്ക് തിന്നാന്‍ ഇട്ടുകൊടുക്കുംപോലെ ദിലീപിനെ ഉപേക്ഷിക്കുന്നത് ശരിയല്ലെന്ന് അനില്‍ പറഞ്ഞു. ദിലീപിനെ വെറുതേവിടണം. എന്തിനാണെങ്കിലും സ്വന്തമായ അഭിപ്രായം പറയാന്‍ ഇപ്പോള്‍ പേടിയാണ്.
സ്ത്രീവിരുദ്ധനായും ദലിത് വിരുദ്ധനായും മാവോയിസ്റ്റായും ഒറ്റയടിക്ക് മാറിപ്പോകുമെന്നും അനില്‍ പറയുന്നു.
മഞ്ജു വാര്യറുമായുള്ള വിവാഹബന്ധം തകരാന്‍ കാരണക്കാരിയായത് ആക്രമിക്കപ്പെട്ട നടിയാണെങ്കില്‍ വൈരാഗ്യമുണ്ടാകേണ്ടത് മഞ്ജുവിനല്ലേ എന്ന വാദമാണ് സജീവന്‍ അന്തിക്കാട് ഉയര്‍ത്തുന്നത്. കൊടുംകുറ്റവാളിയായ സുനില്‍ കുമാറിന്റെ വാക്കുകേട്ടാണ് നടി ആക്രമിക്കപ്പെട്ട കേസില്‍ ദിലീപിനെ അറസ്റ്റ് ചെയ്തതെന്നാണ് സുരേഷ് കുമാര്‍ പറയുന്നത്.
കൃത്യമായ അന്വേഷണം നടത്തിയാവണം കുറ്റക്കാരനെ കണ്ടെത്തേണ്ടത്. അല്ലാതെ കുറ്റവാളിയായ വ്യക്തിപറയുന്നത് കേട്ടാവരുത്.
സംഭവത്തില്‍ ദിലീപ് കുറ്റക്കാരനല്ലെന്ന് തനിക്ക് പൂര്‍ണ വിശ്വാസമുണ്ട്. ചെയ്യാത്ത കുറ്റത്തിനാണ് ദിലീപ് ജയിലില്‍ കഴിയുന്നതെന്നും സുരേഷ് കുമാര്‍ പറഞ്ഞു.