മട്ടന്നൂര്‍: മട്ടന്നൂര്‍ നഗരസഭാ തെരഞ്ഞെടുപ്പ് ഇന്ന് നടക്കും. രാവിലെ ഏഴിന് തുടങ്ങി വൈകിട്ട് അഞ്ചിന് വോട്ടെടുപ്പ് സമാപിക്കും. 35 നഗരസഭാ വാര്‍ഡുകളിലേക്ക് 35 പോളിങ് സ്റ്റേഷനുകള്‍ ഒരുക്കിയിട്ടുണ്ട്. ആകെ 36,323 വോട്ടര്‍മാരാണ് നഗരസഭാ പരിധിയിലുള്ളത്.
112 സ്ഥാനാര്‍ഥികള്‍ മത്സര രംഗത്തുണ്ട്. പഴശ്ശി, പൊറോറ, കോളാരി പഞ്ചായത്തുകളെ സംയോജിപ്പിച്ച് കൊണ്ട് 1962ലാണ് മട്ടന്നൂര്‍ പഞ്ചായത്ത് രൂപീകരിച്ചത്. സംസ്ഥാനത്ത് എവിടെയും തെരഞ്ഞെടുപ്പില്ലാത്ത സമയം മട്ടന്നൂരില്‍ നടക്കുന്ന നഗരസഭാ തെരഞ്ഞെടുപ്പ് രാഷ്ട്രീയകേരളം ഉറ്റുനോക്കുന്നതാണ്.
കഴിഞ്ഞ 20 വര്‍ഷം എല്‍.ഡി.എഫ് മാത്രം ഭരിച്ച നഗരസഭയാണിത്. വ്യാഴാഴ്ചയാണ് വോട്ടെണ്ണല്‍. മട്ടന്നൂര്‍ ഹയര്‍ സെക്കന്‍ഡറി സ്‌കൂളാണ് വോട്ടെണ്ണല്‍ കേന്ദ്രം. ഇത്തവണ നഗരസഭാ അധ്യക്ഷ സ്ഥാനം വനിതാസംവരണമാണ്.