തിരുവനന്തപുരം: വിഴിഞ്ഞത്ത് വിദേശ കപ്പല്‍ മത്സ്യബന്ധന ബോട്ടിലിടിച്ച് മൂന്നു പേര്‍ക്കു പരുക്ക്.

വിഴിഞ്ഞം തുറമുഖത്തിനടുത്താണ് സംഭവം. മത്സ്യബന്ധനത്തിന് പോയ ഫൈബര്‍ ബോട്ടിലാണ് കപ്പല്‍ ഇടിച്ചത്. അപകടത്തില്‍ ടെനി, ആന്റണി, ദാസന്‍ എന്നിവര്‍ക്ക് പരുക്കേറ്റു.

ബോട്ടിലുണ്ടായിരുന്ന മൂന്നു പേര്‍ പരുക്കുകള്‍ കൂടാതെ രക്ഷപ്പെട്ടു.

പുലര്‍ച്ചെ ഒരു മണിയോടെയാണ് അപകടം നടന്നതെന്ന് കരയിലെത്തിയ മത്സ്യത്തൊഴിലാളികള്‍ പറഞ്ഞു.

പൂന്തുറയ്ക്ക് സമീപം 10 നോട്ടിക്കല്‍ മൈല്‍ അകലെയായിരുന്നു സംഭവം. കരയിലെത്തിയ മത്സ്യത്തൊഴിലാളികള്‍ വിഴിഞ്ഞം കോസ്റ്റല്‍ പൊലിസിന് വിവരം കൈമാറുകയായിരുന്നു.

ബോട്ടിലിടിച്ച ശേഷം കപ്പല്‍ നിര്‍ത്താതെ പോയതായി തൊഴിലാളികള്‍ പറഞ്ഞു. കപ്പലിനു വേണ്ടി കോസ്റ്റല്‍ പൊലിസും മറൈന്‍ എന്‍ഫോഴ്‌സ്‌മെന്റും തെരച്ചില്‍ ആരംഭിച്ചതായി അധികൃതര്‍ അറിയിച്ചു.