തൃക്കരിപ്പൂര്‍: കോടികള്‍ മുടക്കി പണിത ജില്ലയിലെ ഏക സിന്തറ്റിക് സ്‌റ്റേഡിയമായ തൃക്കരിപ്പൂര്‍ സ്‌റ്റേഡിയം കാടുകയറി നശിക്കുന്നു. സംസ്ഥാന ക്ലബ് ഫുട്‌ബോള്‍ ഉള്‍പ്പടെ നിരവധി ഫുട്‌ബോള്‍ മേളക്ക് വേദിയായ സിന്തറ്റിക് സ്‌റ്റേഡിയത്തില്‍ നിലവില്‍ തൃക്കരിപ്പൂര്‍ ഫുട്‌ബോള്‍ അക്കാദമി ശനി ഞായര്‍ ദിവസങ്ങളില്‍ പരിശീലനം നല്‍കുന്നുണ്ട്. കൃത്രിമ പുല്‍ത്തകിടിക്ക് ചുറ്റുമായി കാടുകള്‍ വളര്‍ന്നു കഴിഞ്ഞു. പുല്‍ത്തകിടിയിലേക്ക് കാടുപാര്‍ന്നു പിടിക്കാതിരിക്കാന്‍ മൂന്നടി വീതിയില്‍ സ്‌റ്റേഡിയത്തിന് ചുറ്റും ഇന്റര്‍ലോക്ക് ചെയ്തിട്ടുണ്ടെങ്കിലും ഇന്റര്‍ ലോക്കിലേക്ക് കാടുകള്‍ പടര്‍ന്നുകയറാന്‍ തുടങ്ങിയിട്ടുണ്ട്. നിര്‍മാണം പൂര്‍ത്തിയാക്കി വര്‍ഷം പിന്നിട്ടിട്ടും ഇതുവരെ അറ്റകുറ്റ പ്രവൃത്തി നടത്തിയിട്ടില്ല. കൃത്യമായ രീതിയില്‍ അറ്റകുറ്റ പ്രവൃത്തി നടത്തിയാല്‍ മാത്രമേ സ്‌റ്റേഡിയം അതിന്റെ പ്രൗഡിയില്‍ സൂക്ഷിക്കാന്‍ കഴിയുകയുള്ളൂവെന്ന് ഫുട്‌ബോള്‍ സംഘാടകരുടെയും കളിക്കാരുടെയും അഭിപ്രായം. തൃക്കരിപ്പൂര്‍ പഞ്ചായത്ത് വിട്ടു നല്‍കിയ 15 ഏക്കര്‍ സ്ഥലത്ത് ദേശീയ ഗെയിംസ് അക്കാദമിയുടെ മേല്‍നോട്ടത്തില്‍ ന്യൂ ഡല്‍ഹിയിലെ ശിവനരേഷ് കമ്പനിയാണ് സ്‌റ്റേഡിയം നിര്‍മിച്ചത്. ആവശ്യമായ സമയത്ത് സ്‌റ്റേഡിയത്തിലെ പുല്‍ത്തകിടിയില്‍ വിതറാനുള്ള റബര്‍ മണലുകള്‍ സ്‌റ്റേഡിയത്തിന്റെ വിവിധ ഭാഗങ്ങളില്‍ അനാഥമായി ഇടന്ന് മഴയില്‍ ഒലിച്ചിറങ്ങി നശിച്ചുകൊണ്ടിരിക്കുന്നുണ്ട്. കാല വര്‍ഷം പൂര്‍ത്തിയാകുന്നതോടെ നിരവധി ഫുട്‌ബോള്‍ മേളകള്‍ നടക്കേണ്ട സ്‌റ്റേഡിയം ഉടന്‍ അറ്റകുറ്റ പ്രവൃത്തി നടത്തിയില്ലെങ്കില്‍ ജില്ലയിലെ ഏക സിന്തറ്റിക് സ്‌റ്റേഡിയം തകരുമെന്നാണ് ഫുട്‌ബോള്‍ അളിയുമായി ബന്ധപ്പെട്ടവര്‍ പറയുന്നത്.