പുതുക്കാട്: ബൈക്കിലെത്തി റോഡില്‍ സ്‌ഫോടക വസ്തു എറിഞ്ഞു ഭീകരാന്തരീക്ഷം സൃഷ്ടിച്ച സംഭവത്തില്‍ ഒരാള്‍ പിടിയിലായി. നെല്ലായി പന്തല്ലൂര്‍ ആലപ്പാട്ട് മാടാനി വീട്ടില്‍ ജോര്‍ജിന്റെ മകന്‍ ജിജോ (26) നെയാണ് പുതുക്കാട് പൊലിസ് ഞായറാഴ്ച അറസ്‌ററ് ചെയ്തത്. കഴിഞ്ഞ മാസം ഏഴിന് നെടുമ്പാളില്‍ ആയിരുന്നു സംഭവം. ആഡംബര ബൈക്കിലെത്തിയ ജിജോയും സുഹൃത്തും ചേര്‍ന്നാണ് റോഡില്‍ സ്‌ഫോടക വസ്തു എറിഞ്ഞത്. ജിജോയുടെ കൂടെ ഉണ്ടായിരുന്ന സുഹൃത്തിനെ തിരിച്ചറിഞ്ഞെന്നും ഉടനെ പിടിയിലാവുമെന്നും പൊലിസ് പറഞ്ഞു. ജിജോയെ തിങ്കളാഴ്ച കോടതിയില്‍ ഹാജരാക്കി.