മുംബൈ: പ്രധാനമന്ത്രിയെന്ന നിലയില്‍ മോദി പൂര്‍ണ പരാജയമെന്ന് ബി.ജെ.പി അനുകൂലിയായ കര്‍ഷക നേതാവ്. അടുത്ത ലോക്‌സഭാ തെരഞ്ഞെടുപ്പില്‍ വിജയിക്കണമെങ്കില്‍ മോദിയെ മാറ്റി കേന്ദ്ര മന്ത്രി നിതിന്‍ ഗഡ്കരിയെ പ്രധാനമന്ത്രി സ്ഥാനാര്‍ഥിയാക്കൂ എന്നാണ് മഹാരാഷ്ട്രയിലെ കര്‍ഷക നേതാവ് സംഘ് പരിവാറിനോട് ആവശ്യപ്പെട്ടത്.
മഹാരാഷ്ട്ര സര്‍ക്കാര്‍ നിയോഗിച്ച സമിതിയായ വസന്തറാവു നായിക് ഷെട്ടി സ്വാവലംബന്‍ മിഷന്‍ ചെയര്‍മാനായ കര്‍ഷക നേതാവ് കിഷോര്‍ തിവാരിയാണ് മോദിയുടെ ജനകീയത ഇല്ലാതായെന്ന് ചൂണ്ടിക്കാട്ടി ആര്‍.എസ്.എസിനോട് ഗഡ്കരിയെ കൊണ്ടുവരൂ എന്ന് ആവശ്യപ്പെട്ടത്. മഹാരാഷ്ട്രയിലെ താനെയിലും പൂനെയിലും മെട്രോ റെയില്‍ സ്റ്റേഷന് തറക്കല്ലിടല്‍ അടക്കം നിരവധി പരിപാടിക്കായി മോദി സംസ്ഥാനത്ത് എത്തിയതിനിടയിലാണ് കര്‍ഷക നേതാവ് ഇത്തരത്തിലൊരു ആവശ്യം ഉന്നയിച്ചത്.
മധ്യപ്രദേശ്, രാജസ്ഥാന്‍, ഛത്തിസ്ഗഡ് സംസ്ഥാനങ്ങളില്‍ ബി.ജെ.പിക്കുണ്ടായ പരാജയം ചൂണ്ടിക്കാട്ടിയ കിഷോര്‍ തിവാരി, ആര്‍.എസ്.എസ് അധ്യക്ഷന്‍ മോഹന്‍ ഭാഗവത്, ജനറല്‍ സെക്രട്ടറി ഭയ്യാജി സുരേഷ് ജോഷി എന്നിവര്‍ക്ക് കത്തയക്കുകയും ചെയ്തു.
മൂന്ന് സംസ്ഥാനങ്ങളിലും പാര്‍ട്ടിക്കുണ്ടായ പരാജയം നേതാക്കളുടെ അഹങ്കാരം കാരണമാണ്. ആരോടും അന്വേഷിക്കാതെ നോട്ട് നിരോധിച്ചതും ജി.എസ്.ടി നടപ്പാക്കിയതുംഇന്ധന വില നിയന്ത്രണമില്ലാതാക്കിയതുമെല്ലാം ജനങ്ങള്‍ക്ക് സര്‍ക്കാരിനെതിരായ വികാരം ആളിക്കത്തിക്കാന്‍ ഇടയാക്കിയിട്ടുണ്ട്.
സമൂഹത്തിനും രാജ്യത്തിനും ഭീഷണിയാകുന്ന രീതിയിലാണ് പാര്‍ട്ടി നേതാക്കളും സര്‍ക്കാരും പ്രവര്‍ത്തിക്കുന്നത്.
ഇത്തരം സംഭവങ്ങള്‍ വീണ്ടും ആവര്‍ത്തിക്കാതിരിക്കാന്‍ അടുത്ത ലോക്‌സഭാ തെരഞ്ഞെടുപ്പില്‍ നിതിന്‍ ഗഡ്കരിയെ പ്രധാനമന്ത്രി സ്ഥാനാര്‍ഥിയാക്കണമെന്നാണ് കിഷോര്‍ തിവാരി ആവശ്യപ്പെട്ടത്.