കൊണ്ടോട്ടി: സംസ്ഥാന ഹജ്ജ് കമ്മിറ്റി മുഖേന ഈ വര്‍ഷത്തെ തീര്‍ഥാടനത്തിന് 126 പേര്‍ക്ക് കൂടി അവസരം ലഭിച്ചു. കാത്തിരിപ്പ് പട്ടികയില്‍ ക്രമനമ്പര്‍ 560 മുതല്‍ 709 വരെയുള്ളവര്‍ക്കാണ് പുതുതായി അവസരം കൈവന്നത്. ഇവര്‍ക്ക് മക്കയില്‍ അസീസിയ കാറ്റഗറിയിലാണ് താമസ സൗകര്യം ലഭിക്കുക. തിരഞ്ഞെടുക്കപ്പെട്ടവര്‍ 2,01,750 രൂപ ഓഗസ്്റ്റ് 11 നകം അടക്കണം.
മുഴുവന്‍ വിമാനക്കൂലിയും അടക്കേണ്ട റിപ്പീറ്റര്‍ വിഭാഗത്തിലുള്ളവര്‍ കൂടുതലായി 10,750 രൂപയും ബലികര്‍മത്തിനുള്ള കൂപ്പണ്‍ ആവശ്യപ്പെട്ടവര്‍ 8,000രൂപയും അടക്കണം. പണമടച്ച ബാങ്ക് പേ ഇന്‍ സ്ലിപ്പിന്റെ കോപ്പിയും മെഡിക്കല്‍ സര്‍ട്ടിഫിക്കും ഓഗസ്റ്റ് 11നകം സംസ്ഥാന ഹജ്ജ് കമ്മിറ്റിക്ക് സമര്‍പ്പിക്കണം. വിവരങ്ങള്‍ക്ക് ഹജ്ജ് ട്രെയിനര്‍മാരുമായി ബന്ധപ്പെടണമെന്ന് ഹജ്ജ് കമ്മിറ്റി അസി. സെക്രട്ടറി അറിയിച്ചു.
കേരളത്തില്‍നിന്ന് ഹജ്ജിന് അവസരം ലഭിച്ചവരുടെ എണ്ണം ഇതോടെ 11462 ആയി. ലക്ഷദ്വീപില്‍നിന്ന് 305 പേരും മാഹിയില്‍നിന്നുള്ള 28 പേരും നെടുമ്പാശ്ശേരിയില്‍നിന്നാണ് യാത്രയാകുന്നത്. ഇതോടെ നെടുമ്പാശ്ശേരി വഴിയുളള തീര്‍ഥാടകരുടെ എണ്ണം 11,815 ആകും.