പേരാമ്പ്ര: ചെങ്ങോടുമലയില്‍ നിന്നും അനധികൃതമായി മരം മുറിക്കുന്നത് കോട്ടൂര്‍ ഗ്രാമപഞ്ചായത്ത് അധികൃതരും സി.പി.എം പ്രവര്‍ത്തകരും തടഞ്ഞു. നാല് ഏക്കറോളം സ്ഥലത്തെ മുഴുവന്‍ മരങ്ങളും ചൊവ്വാഴ്ച്ച മുറിച്ചുമാറ്റിയിരുന്നു. കഴിഞ്ഞദിവസവും മരം മുറിക്കാനുള്ള നീക്കം നടത്തുമ്പോഴാണ് തടഞ്ഞത്. മലബാര്‍ വന്യജീവി സങ്കേതത്തില്‍ നിന്നും എട്ട് കിലോമീറ്റര്‍ ദൂരം മാത്രമുള്ള ചെങ്ങോടുമലയില്‍ ചന്ദനം, തേക്ക്, ഇരൂള്‍ ഉള്‍പ്പെടെയുള്ള മരങ്ങളും വംശനാശ ഭീഷണി നേരിടുന്ന നിരവധി ജന്തുക്കളും അധിവസിക്കുന്നു.
ക്വാറി കമ്പനി മരം മുറിച്ച് മാറ്റിയതോടെ ഇവക്കെല്ലാം നാശം സംഭവിച്ചു. കഴിഞ്ഞ ജൂണ്‍ മാസം ഇവിടെ രണ്ടേക്കറോളം സ്ഥലത്തെ മരംമുറിച്ചപ്പോള്‍ പെരുവണ്ണാമൂഴി റേഞ്ച് ഓഫിസര്‍ സ്ഥലം സന്ദര്‍ശിച്ച് കേസെടുത്തിരുന്നു. മരംമുറിക്കുന്നതിന് കമ്പനി സമര്‍പ്പിച്ച അപേക്ഷ ഡി.എഫ്.ഒ തള്ളുകയും ചെയ്തിരുന്നു. എന്നാല്‍ ഇതിനെതിരേ കമ്പനി ഹൈക്കോടതിയില്‍ ഈ കേസ് ഫയല്‍ ചെയ്യുകയും അനുകൂല വിധി നേടിയെടുക്കുകയും ചെയ്തു. ഇതിനെതിരേ ഡി.എഫ്.ഒ അപ്പീല്‍ നല്‍കിയിരിക്കുകയാണ്.
ഈ സാഹചര്യത്തിലാണ് വ്യാപകമായി മരം മുറി നടക്കുന്നത്. ചെങ്ങോടുമലയില്‍ കരിങ്കല്‍ ഖനനം നടത്തുന്നതിനെതിരേ സമരസമിതി ഹൈക്കോടതിയില്‍ കേസ് ഫയല്‍ ചെയ്തിരിക്കുകയാണ്. ഈ കേസില്‍ പ്രധാനമായും ചൂണ്ടികാണിക്കുന്നത് ചെങ്ങോടുമലയിലെ ജൈവവൈവിധ്യമാണ്. ഇത് നശിപ്പിച്ച് കേസ് അനുകൂലമാക്കാനുള്ള ശ്രമമാണ് സ്വകാര്യ കമ്പനി നടത്തുന്നതെന്ന് സമരസമിതി ആരോപിച്ചു.
ഗ്രാമ പഞ്ചായത്ത് വൈ. പ്രസിഡന്റ് കെ.കെ ബാലന്‍, സ്റ്റാന്റിങ് കമ്മിറ്റി ചെയര്‍മാന്‍ കെ. ഹമീദ്, സി.പി.എം അവിടനല്ലൂര്‍ ലോക്കല്‍ സെക്രട്ടറി ടി. ഷാജു. ലോക്കല്‍ കമ്മിറ്റി അംഗം ഷൈജു അരയന്‍മ്മാടന്‍, ബ്രാഞ്ച് സെക്രട്ടറി എം.കെ സതീഷ്, ലിനീഷ് നരയംകുളം എന്നിവരുടെ നേതൃത്വത്തിലാണ് തടഞ്ഞത്.
പെരുവണ്ണാമൂഴി ഫോറസ്റ്റ് റേഞ്ച് ഓഫിസര്‍ ടി. റഹീസിന്റെ നേതൃത്വത്തിലുള്ള സംഘം മുറിച്ച മരങ്ങളുടെ കണക്കെടുത്തു. ഉടമക്കെതിരേ കേസെടുക്കുകയും ചെയ്തു. കോടതിയുടെ പരിഗണനയിലുള്ള വിഷയമായതുകൊണ്ട് മരം യാതൊരു കാരണവശാലും മുറിക്കാന്‍ പാടില്ലെന്ന് റേഞ്ചര്‍ പറഞ്ഞു.