ഫറോക്ക്: മത്സ്യബന്ധന ഹാര്‍ബറില്‍ നിര്‍ത്തിയിട്ട ബോട്ടിനു തീപിടിച്ചു. ബേപ്പൂര്‍ അടിയാക്കന്റകത്ത് മുജീബിന്റെ ഉടമസ്ഥതയിലുള്ള ബഹ്‌റൈന്‍ മത്സ്യബന്ധന ബോട്ടാണ് അഗ്നിക്കിരയായത്. ഇതരസംസ്ഥാന തൊഴിലാളികള്‍ ഭക്ഷണം പാചകം ചെയ്യുമ്പോഴാണു തീപിടിത്തമുണ്ടായത്. സ്റ്റൗവില്‍ നിന്ന് വെളിച്ചെണ്ണയിലേക്ക് തീപടര്‍ന്നതാണ് അപകടത്തിനു കാരണമെന്നു കരതുന്നു. ഇന്നലെ രാവിലെ 10.30നാണു സംഭവം.
മത്സ്യബന്ധനം കഴിഞ്ഞ് കഴിഞ്ഞദിവസം രാത്രിയാണ് ബോട്ട് ഹാര്‍ബറിലെത്തിയത്. ഇന്നു പുലര്‍ച്ചെ വീണ്ടും കടലില്‍ പോകാനിരിക്കെയാണ് അപകടം. വീല്‍ഹൗസ് പൂര്‍ണമായും കത്തിച്ചാമ്പലായി. ബോട്ടിലെ വല, ജി.പി.എസ്, എക്കോ സൗണ്ടര്‍, വയര്‍ലെസ്, ബാറ്ററി, കേബിളുകള്‍, വയറിങ്, തൊഴിലാളികളുടെ തിരിച്ചറിയല്‍ രേഖകള്‍, മൊബൈല്‍ ഫോണ്‍ തുടങ്ങിയവയും അഗ്നിക്കിരയായി.
സംഭവം നടക്കുമ്പോള്‍ ഏഴു തൊഴിലാളികള്‍ ബോട്ടിലുണ്ടായിരുന്നു. വീല്‍ഹൗസിനകത്ത് തീ കത്തിപ്പടര്‍ന്നതോടെ തൊഴിലാളികള്‍ സമീപത്തെ ബോട്ടിലേക്കു ചാടിരക്ഷപ്പെട്ടു. തീയും പുകയും വലിയ രീതിയില്‍ ഉയര്‍ന്നത് ഹാര്‍ബറില്‍ ഭീതി സൃഷ്ടിച്ചു. തീ വ്യാപിക്കുന്നതു കണ്ട മത്സ്യത്തൊഴിലാളികളും മീഞ്ചന്തയില്‍ അസി. സ്റ്റേഷന്‍ ഓഫിസര്‍ പി.കെ ബഷീറിന്റെ നേതൃത്വത്തില്‍ അഗ്നിശമന സേനയും എത്തി തീ അണച്ചതിനാല്‍ വന്‍ ദുരന്തം ഒഴിവായി. ബേപ്പൂര്‍ എസ്.ഐ റെനീഷ് കെ. ഹാരിസ്, കോസ്റ്റല്‍ എസ്.ഐ കെ.സി അരവിന്ദാക്ഷന്‍ സംഭവസ്ഥലത്തെത്തിയരുന്നു. പത്തു ലക്ഷം രൂപയുടെ നഷ്ടം കണക്കാക്കുന്നു.