പുതുക്കാട് (തൃശൂര്‍): പാലിയേക്കര ടോള്‍ പ്ലാസയിലെ വാഹനക്കുരുക്കില്‍ അകപ്പെട്ട തൃശൂര്‍ ജില്ലാ കലക്ടര്‍ ടി.വി അനുപമ ടോള്‍ ബൂത്ത് തുറന്ന് വാഹനങ്ങള്‍ കടത്തിവിട്ടു. ടോള്‍ പ്ലാസ ജീവനക്കാരെയും പൊലിസിനെയും രൂക്ഷമായി ശാസിച്ച കലക്ടര്‍ ടോള്‍ ബൂത്ത് തുറന്നുകൊടുക്കാന്‍ നിര്‍ദേശിക്കുകയായിരുന്നു.
വ്യാഴാഴ്ച രാത്രി 11.30നായിരുന്നു സംഭവം. ഈ സമയം ടോള്‍ പ്ലാസയ്ക്ക് ഇരുവശത്തും ഒന്നര കിലോമീറ്ററോളം വാഹനങ്ങളുടെ നീണ്ട നിരയുണ്ടായിരുന്നു. ടോള്‍ പ്ലാസ സെന്ററിനുള്ളില്‍ കാര്‍ നിര്‍ത്തിയ കലക്ടര്‍ ജീവനക്കാരെ വിളിച്ചുവരുത്തി. യാത്രക്കാരെ വലയ്ക്കുന്നതിന്റെ കാരണമാരാഞ്ഞു. തുടര്‍ന്ന് ഇവിടെ ഡ്യൂട്ടിയിലുണ്ടായിരുന്ന പൊലിസുകാരോട് ടോള്‍ബൂത്ത് തുറന്നുകൊടുക്കാന്‍ നിര്‍ദേശിക്കുകയും ചെയ്തു.