ടോക്കിയോ: ഉത്തരകൊറിയയുടെ പ്രകോപനങ്ങള്‍ സഹിക്കാനാകാത്തതാണെന്ന് ജപ്പാന്‍. പസഫിക് സമുദ്രത്തിലെ യു.എസ് സൈനികത്താവളമായ ഗുവാമിനെ ആക്രമിക്കുമെന്ന് ഉത്തരകൊറിയ ഭീഷണി മുഴക്കിയ സാഹചര്യത്തിലാണ് ജപ്പാന്റെ പ്രതികരണം.
ഗുവാമിനു നേരേ തൊടുക്കുന്ന മിസൈലുകള്‍ ജപ്പാനു മുകളിലൂടെയാവും പറക്കുക എന്നതിനാലാണ് ഈ വിഷയത്തില്‍ ഉത്തരകൊറിയക്കെതിരേ കടുത്ത പ്രതികരണവുമായി ജപ്പാന്‍ രംഗത്തെത്തിയത്. ജപ്പാന്‍ സര്‍ക്കാരിന്റെ ഒദ്യോഗിക വക്താവ് യോഷിഹിഡെ സുഗയാണ് ഇക്കാര്യം വ്യക്തമാക്കിയത്. തങ്ങള്‍ക്കിത് ഒരിക്കലും സഹിക്കാനാകില്ല, അന്താരാഷ്ട്ര സമൂഹത്തിന്റെ തന്നെ സുരക്ഷയ്ക്ക് മേലുള്ള പ്രകോപനമാണിതെന്നും അദ്ദേഹം പറഞ്ഞു.
ഉത്തരകൊറിയയുമായി ബന്ധപ്പെട്ട വിഷയത്തില്‍ യു.എസും ജപ്പാനും കൂടിയാലോചന നടത്തിക്കൊണ്ടിരിക്കുകയാണെന്നും ഓഗസ്റ്റ് 17 ന് ഇരു രാജ്യങ്ങളുടെയും വിദേശകാര്യ, പ്രതിരോധ മന്ത്രിമാരുടെ യോഗം ചേരാന്‍ തീരുമാനിച്ചിട്ടുണ്ടെന്നും യോഷിഹിഡെ സുഗ വ്യക്തമാക്കി.