രാജു ശ്രീധര്‍

കൊല്ലം: ഹര്‍ത്താലിനെതിരേ പൊതു വികാരം കൂടുതല്‍ ശക്തമാകുന്നതിന്റെ ഭാഗമായി ഏറ്റവും ഒടുവില്‍ സംസ്ഥാനത്തെ മത്സ്യബന്ധന,അനുബന്ധ മേഖലകളും ഹര്‍ത്താലിനെ പടിക്ക് പുറത്താക്കുന്നു. വ്യാപാരി,മോട്ടോര്‍ വാഹന സംഘടനകള്‍ക്ക് പിന്നാലെ ഹര്‍ത്താല്‍ വിരുദ്ധ കൂട്ടായ്മയില്‍ അണിചേരാന്‍ സംസ്ഥാനത്തെ മല്‍സ്യത്തൊഴിലാളി സംഘടനകളും തീരുമാനിച്ചു. ഈ വര്‍ഷം ഹര്‍ത്താല്‍ മൂലം മല്‍സ്യബന്ധനമേഖലയ്ക്ക് ആകെയുണ്ടായ നഷ്ടം 110 കോടി രൂപയാണെന്ന് കണക്കുകള്‍ പറയുന്നു. ഹര്‍ത്താല്‍ ദിനങ്ങളില്‍ ബോട്ടൊന്നിന് രണ്ടര ലക്ഷം മുതല്‍ അഞ്ച് ലക്ഷം രൂപയുടെ വരെ നഷ്ടമാണ് ഉണ്ടാകുന്നത്. മത്സ്യത്തൊഴിലാളികള്‍, ബോട്ടുടമകര്‍, കച്ചവടക്കാര്‍, ഐസ് നിര്‍മാണ മേഖലയിലെ തൊഴിലാളികള്‍,പീലിംഗ് തൊഴിലാളികള്‍ തുടങ്ങിയവരെ ഹര്‍ത്താല്‍ ഒരുപോലെ ബാധിക്കുന്നുണ്ടെന്ന് തൊഴിലാളികള്‍ പറയുന്നു.
സാധാരണ ദിവസങ്ങളില്‍ ശരാശരി ആയിരം രൂപവരെ ഒരു കുട്ട മത്സ്യത്തിന് ലഭിക്കുന്നെങ്കില്‍ ഹര്‍ത്താല്‍ ദിനങ്ങളില്‍ അത് 400 ല്‍ താഴെയാകുമെന്ന് സംസ്ഥാന ഫിഷിംഗ് ബോട്ട് ഓപ്പറേറ്റേഴ്‌സ് അസോസിയേഷന്‍ നേതാവ് പീറ്റര്‍ മത്യാസ് പറഞ്ഞു. സ്ത്രീ തൊഴിലാളികളാണ് കൂടുതലും പീലിംഗ് മേഖലയെ ആശ്രയിച്ച് കഴിയുന്നത്. ഒരു കുട്ട ചെമ്മീന്‍ തൊലി കളയമ്പോള്‍(പീലിംഗ്) സാധാരണ ദിവസങ്ങളില്‍ ആയിരം രൂപയാണ് ലഭിക്കുന്നതെങ്കില്‍ ഹര്‍ത്താല്‍ ദിവസങ്ങളില്‍ അത് 200 വരെ ആകും. സംസ്ഥാനത്താകെ ദിവസവും അരലക്ഷം കിലോ ചെമ്മീനാണ് പീലിംഗ് നടത്തുന്നത്.
ഹര്‍ത്താല്‍ ദിനത്തിലാകട്ടെ ഇത് പതിനായിരത്തില്‍ താഴെയായി കുറയും. വ്യാപാരി വ്യവസായി,മോട്ടാര്‍ വാഹന യൂനിയനുകള്‍ സഹകരിച്ച് പ്രവര്‍ത്തിച്ചാല്‍ മത്സ്യബന്ധ മേഖലയ്ക്ക് വരും വര്‍ഷങ്ങളില്‍ കാര്യമായ ലാഭം ഉണ്ടാക്കാന്‍ സാധിക്കുമെന്നാണ് മല്‍സ്യബന്ധനമേഖലയില്‍ പ്രവര്‍ത്തിക്കുന്ന വിവിധ സംഘടനകളുടെ വിലയിരുത്തല്‍.