കല്‍പ്പറ്റ: ഒരുമയോടെ നില്‍ക്കുന്ന ജനതയെ വനിതാ-വര്‍ഗീയ-ജാതി മതിലുണ്ടാക്കി വേര്‍തിരിക്കുന്ന സര്‍ക്കാര്‍ നടപടികള്‍ അപലപനീയമാണെന്നും രാഷ്ട്രീയ ലാഭത്തിനായി നടത്തുന്ന മതിലില്‍ അധ്യാപക-സര്‍ക്കാര്‍ ജീവനക്കാര്‍ അണിനിരക്കരുതെന്നും കേരളാ സ്‌കൂള്‍ ടീച്ചേഴ്‌സ് യൂനിയന്‍ (കെ.എസ്.ടി.യു) ജില്ലാ കണ്‍വന്‍ഷന്‍ ആവശ്യപ്പെട്ടു.
മനുഷ്യര്‍ക്കിടയില്‍ ഐക്യത്തിന് പകരം ഭിന്നതയുണ്ടാക്കുന്ന മതിലുമായി സഹകരിക്കില്ലെന്നും മതിലിനെതിരേ സംഘടിക്കാന്‍ അധ്യാപക-ജീവനക്കാര്‍ തയാറാവണമെന്നും കണ്‍വന്‍ഷന്‍ ആവശ്യപ്പെട്ടു. വനിതാ മതിലിനായി വിദ്യാഭ്യാസ വകുപ്പ് മുഖേന ജില്ലയില്‍ നിന്ന് 3,000 പേരെയാണ് കോഴിക്കോട്ടേക്ക് കൊണ്ട് പോകുന്നത്. ഇവര്‍ക്കുള്ള യാത്രാ സൗകര്യം, യാത്രാ ചെലവ്, ഭക്ഷണം,മറ്റു ചെലവുകള്‍ തുടങ്ങിയവക്കുള്ള ഫണ്ട് ആരാണ് വഹിക്കുകയെന്ന് വകുപ്പ് അധികാരികള്‍ വ്യക്തമാക്കണം.
ജില്ലാ-ഉപജില്ലാ ഓഫിസുകള്‍ ശാസ്ത്രീയമായി വിഭജിക്കണം, പി.എഫ്.തുക പിന്‍വലിക്കുന്നതിനുള്ള നിയന്ത്രണങ്ങള്‍ ഒഴിവാക്കണം. ഐ.ടി.പരിശീലനം ലഭിക്കാത്തതിന്റെ പേരില്‍ അധ്യാപകര്‍ക്ക് അര്‍ഹതപ്പെട്ട വാര്‍ഷിക ഇന്‍ക്രിമെന്റ് തടഞ്ഞ നടപടി പിന്‍വലിക്കണമെന്നും കണ്‍വന്‍ഷന്‍ ആവശ്യപ്പെട്ടു. കെ.എസ്.ടി.യു സംസ്ഥാന ജനറല്‍ സെക്രട്ടറി വി.കെ മൂസ കണ്‍വന്‍ഷന്‍ ഉദ്ഘാടനം ചെയ്തു.
ജില്ലാ പ്രസിഡന്റ് കെ.പി ഷൗക്കുമാന്‍ അധ്യക്ഷനായി. സംസ്ഥാന സെക്രട്ടറി പി.പി മുഹമ്മദ്, സംസ്ഥാന സമിതി അംഗം ഇ.ടി റിഷാദ്, കെ. നസീര്‍, കെ.സി ഹമീദ്, പി. മുഹമ്മദ് ഷരീഫ്, കെ.എം മുഹമ്മദ് റാഫി, എം. അബൂബക്കര്‍, എം.യു ലത്തീഫ്, പി. നിസാമുദ്ദീന്‍, ജനറല്‍ സെക്രട്ടറി നിസാര്‍ കമ്പ സംസാരിച്ചു.