കല്‍പ്പറ്റ: കൈനാട്ടിയിലുള്ള ജനറല്‍ ആശുപത്രിയില്‍ ഒ.പി പ്രവര്‍ത്തന ഉദ്ഘാടനം ഈമാസം 13ന് നടക്കുമെന്ന് സി.കെ ശശീന്ദ്രന്‍ എം.എല്‍.എ, കല്‍പ്പറ്റ നഗരാസഭാ ചെയര്‍പേഴ്‌സണ്‍ ബിന്ദുജോസ് എന്നിവര്‍ വാര്‍ത്താസമ്മേളനത്തില്‍ അറിയിച്ചു. ആരോഗ്യമന്ത്രി കെ.കെ ശൈലജ ഉദ്ഘാടനം ചെയ്യും. നിലവില്‍ പൊലി സ്റ്റേഷന് സമീപത്ത ആശുപത്രിയിലെ പരിമിതമായ സൗകര്യത്തിലാണ് ഒ.പി അടക്കം പ്രവര്‍ത്തിച്ച് വരുന്നത്. പലപ്പോഴും ഇവിടം രോഗികളെ കൊണ്ട് വീര്‍പ്പ്മുട്ടലാണ്. കല്‍പ്പറ്റയിലെയും സമീപ പ്രദേശങ്ങളിലെയും സാധാരണക്കാരുടെ പ്രധാന ആശ്രയകേന്ദ്രമാണ് ഈ ആശുപത്രി. സൗകര്യം പരിമിതമായതോടെയാണ് കൈനാട്ടിയില്‍ പുതിയ കെട്ടിടം ആരംഭിക്കുന്നത്. എന്‍.എ.ആര്‍.എച്ച്.എം ഫണ്ട് ഉപയോഗിച്ച് നിര്‍മാണം പൂര്‍ത്തിയാക്കിയ പുതിയ കെട്ടിടത്തില്‍ ഒ.പി, ലാബ്, ഫാര്‍മസി എന്നിവയുടെ പ്രവര്‍ത്തനങ്ങളാണ് ആദ്യഘട്ടത്തില്‍ ആരംഭിക്കുന്നത്. രാവിലെ പത്തിന് നടക്കുന്ന ഉദ്ഘാടന ചടങ്ങില്‍ എം.ഐ ഷാനവാസ് എം.പി ലബോറട്ടറി ഉദ്ഘാടനം ചെയ്യും. വാര്‍ത്താസമ്മേളനത്തില്‍ ഡോ. സച്ചിന്‍കുമാറും പങ്കെടുത്തു.