പെരിന്തല്‍മണ്ണ: മലപ്പുറം പെരിന്തല്‍മണ്ണയില്‍ ദുരൂഹ സാഹചര്യത്തില്‍ യുവാവ് വെടിയേറ്റ് മരിച്ച സംഭവത്തില്‍ എട്ടു പേരെ പൊലിസ് കസ്റ്റഡിയിലെടുത്തു. മരിച്ച മാസിന്റെ സുഹൃത്തുക്കളെയാണ് കസ്റ്റഡിയിലെടുത്തത്. മാസിന് നേരെ എയര്‍ഗണ്‍ ചൂണ്ടുന്ന ഫോട്ടോ ഇവരുടെ ഫോണില്‍ നിന്നും പൊലിസിന് ലഭിച്ചിട്ടുണ്ട്.

ഇന്നലെ വൈകീട്ട് ആറു മണിയോടെയാണ് മാനത്തുമംഗലം സ്വദേശി മാസിന്‍(21) വെടിയേറ്റ് മരിച്ചത്. കഴുത്തിനു പിന്നില്‍ വെടിയേറ്റ നിലയില്‍ ആശുപത്രിയില്‍ പ്രവേശിപ്പിച്ച ശേഷമാണ് മരിച്ചത്.

പിന്‍കഴുത്തിന് വെടിയേറ്റ നിലയില്‍ വൈകിട്ട് അഞ്ചരയോടെയാണ് ഇയാളെ പെരിന്തല്‍മണ്ണ അല്‍ഷിഫ ആശുപത്രിയിലെത്തിക്കുന്നത്.
രക്തത്തില്‍ കുളിച്ച യുവാവിനെ ഒരു സ്‌കൂട്ടറില്‍ നടുക്കിരുത്തി രണ്ട് പേരാണ് ആശുപത്രിയിലെത്തിച്ചത്. ആശുപത്രിയിലാക്കിയ ശേഷം ഇവര്‍ പിന്നീട് സ്ഥലത്ത് നിന്ന് രക്ഷപ്പെടുകയായിരുന്നു.

എയര്‍ഗണില്‍ നിന്നുള്ള വെടിയേറ്റാണ് ഇയാള്‍ മരിച്ചതെന്നാണ് പ്രാഥമിക നിഗമനം. സംഭവത്തില്‍ പെരിന്തല്‍മണ്ണ പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്. പെരിന്തല്‍മണ്ണ അല്‍ഷിഫ ആശുപത്രിയില്‍ സൂക്ഷിച്ചിരിക്കുന്ന മൃതദേഹം ഇന്ന് പോസ്റ്റുമോര്‍ട്ടത്തിനു ശേഷം ബന്ധുക്കള്‍ക്ക് വിട്ടുകൊടുക്കും.