വാഷിങ്ടണ്‍: അമേരിക്കയില്‍ ഒരാഴ്ച മുന്‍പ് ഉടലെടുത്ത ഭരണസ്തംഭനം പരിഹാരമാകാതെ തുടരുന്നു. മെക്‌സിക്കോ അതിര്‍ത്തി മതില്‍ വിഷയത്തില്‍ പ്രസിഡന്റ് ഡൊണാള്‍ഡ് ട്രംപ് ഉറച്ചുനില്‍ക്കുന്നതാണ് ഭരണസ്തംഭനം നീണ്ടുപോകാന്‍ കാരണമാകുന്നത്. കഴിഞ്ഞദിവസം യു.എസ് ജനപ്രതിനിധി സഭയും സെനറ്റും അല്‍പനേരത്തേക്ക് ചേര്‍ന്നെങ്കിലും തീരുമാനം കൈക്കൊള്ളാനാകാതെ പിരിഞ്ഞു. തിങ്കളാഴ്ച വീണ്ടും ഇരുസഭകളും ചേരുമെന്നാണ് വിവരം.

പ്രതിസന്ധി അടുത്തയാഴ്ചയും മാറ്റമില്ലാതെ തുടരുമെന്നാണു രാഷ്ട്രീയ നിരീക്ഷകര്‍ വിലയിരുത്തുന്നത്. ഇന്നലെ സഭകള്‍ ചേര്‍ന്നപ്പോള്‍ അംഗസംഖ്യ വളരെ കുറവായിരുന്നു. മിക്ക പ്രതിനിധികളും സെനറ്റര്‍മാരും യോഗത്തിനായി വാഷിങ്ടണിലേക്കു മടങ്ങിയെത്തിയിരുന്നില്ല. പ്രതിസന്ധി 2019ലും തുടരുമെന്ന് ഉറപ്പായതോടെ രാജ്യത്തെ ഭരണസ്ഥാപനങ്ങളും മാര്‍ക്കറ്റുകളും വന്‍തിരിച്ചടി നേരിടുകയാണ്. 15 ഫെഡറല്‍ സ്ഥാപനങ്ങളില്‍ ഒന്‍പതിനെയും ഭരണസ്തംഭനം സാരമായി ബാധിച്ചിട്ടുണ്ട്. വിദേശകാര്യം, ആഭ്യന്തര സുരക്ഷ, ഗതാഗതം, കാര്‍ഷികം, നീതിന്യായം തുടങ്ങിയവ ഇതില്‍ പ്രധാനപ്പെട്ട വകുപ്പുകളാണ്. ആയിരക്കണക്കിന് ജീവനക്കാരാണ് വിവിധ ഫെഡറല്‍ സ്ഥാപനങ്ങളില്‍ ശമ്പളമില്ലാതെ ജോലി ചെയ്യാന്‍ നിര്‍ബന്ധിതരായിരിക്കുന്നത്. നിരവധി പേര്‍ ജോലിയില്‍നിന്ന് മാറിനില്‍ക്കുകയും ചെയ്തു.

കഴിഞ്ഞ 21നാണ് ധനകാര്യ ബില്‍ സെനറ്റില്‍ പാസാക്കാത്തതിനെ തുടര്‍ന്ന് അമേരിക്ക ഭരണസ്തംഭനത്തിലേക്ക് നീങ്ങിയത്. മെക്‌സിക്കന്‍ അതിര്‍ത്തിയില്‍ മതില്‍ പണിയാന്‍ പണം അനുദവിക്കണമെന്ന ട്രംപിന്റെ ആവശ്യത്തില്‍ ഡെമോക്രാറ്റ് പ്രതിനിധികള്‍ ഉടക്കിയതാണ് വിനയായത്. മെക്‌സിക്കന്‍ അതിര്‍ത്തി മതിലിനടക്കമുള്ള ധനകാര്യ ബില്ലാണ് ദിവസങ്ങള്‍ക്ക് മുന്‍പ് ട്രംപ് സെനറ്റില്‍ അവതരിപ്പിച്ചത്. ബില്‍ ബുധനാഴ്ച ജനപ്രതിനിധി സഭയില്‍ നേരിയ ഭൂരിപക്ഷത്തിന് പാസായെങ്കിലും മെക്‌സിക്കന്‍ അതിര്‍ത്തി മതില്‍ വിഷയത്തില്‍ ഡെമോക്രാറ്റിക് പാര്‍ട്ടി അംഗങ്ങള്‍ ശക്തമായി എതിര്‍പ്പ് പ്രകടിപ്പിക്കുകയായിരുന്നു.