ഒലവക്കോട്: ഇരുവൃക്കകളും തകരാറിലായ മകന് അച്ഛന്‍ ഒരു വൃക്ക നല്‍കും. ഈ വൃക്ക ശസ്ത്രക്രിയയിലൂടെ മകന്റെ ശരീരത്തിലെത്തിക്കാന്‍ 10 ലക്ഷത്തോളം രൂപ വേണം. ഇത്രയും വലിയ തുക കണ്ടെത്താന്‍ ഒരു നാടുമുഴുവന്‍ നെട്ടോട്ടത്തിലാണ്.
പുതുപ്പരിയാരം ഇന്‍ഡസ്ട്രിയല്‍ എസ്റ്റേറ്റ് ഹാപ്പിനഗര്‍ മുരളി വീട്ടില്‍ ആറുമുഖന്‍ ചെമ്പകം ദമ്പതികളുടെ മകന്‍ ദിലീപ് (23)ആണ് സഹായം തേടുന്നത്. ഏഴുമാസങ്ങള്‍ക്കു മുന്‍പാണു ദിലീപിനു രോഗം കണ്ടെത്തിയത്. തുടര്‍ന്നു ആശുപത്രിയില്‍ ചികില്‍സ തേടി. ഡയാലിസിസ് ചെയ്താണിപ്പോള്‍ ജീവന്‍ നിലനിര്‍ത്തുന്നത്.
മകന്റെ ചികില്‍സക്കായി വന്‍തുക ചെലവായി. കര്‍ഷക തൊഴിലാളികളായ ആറുമുഖനും ചെമ്പകത്തിനും മകന്റെ തുടര്‍ ചികില്‍സക്കുള്ള പണം കണ്ടെത്താന്‍ കഴിയില്ല. എറണാകുളം മെഡിക്കല്‍ ട്രസ്റ്റ് ആശുപത്രിയില്‍ ചികില്‍സയില്‍ കഴിയുന്ന ദിലീപിനു വൃക്കകള്‍ ഉടന്‍ മാറ്റിവയ്ക്കണമെന്നാണു ഡോക്ടര്‍മാര്‍ പറയുന്നത്.
പഞ്ചായത്ത് പ്രസിഡന്റ് എം.കെ.നാരായണന്‍ രക്ഷാധികാരി, പഞ്ചായത്ത് അംഗം സി. മണികണ്ഠന്‍ ചെയര്‍മാനും ദേശക്കമ്മിറ്റി പ്രസിഡന്റ് എ. സുകുമാരന്‍ കണ്‍വീനറുമായി സഹായ കമ്മിറ്റി രൂപീകരിച്ചു. ഫോണ്‍: 9605057482, 9744475798.