കാഞ്ഞിരപ്പള്ളി: ബൈക്ക് തട്ടിയെടുത്ത് വില്‍ക്കാന്‍ ശ്രമിച്ചതായി പരാതി. ചോറ്റി ത്രിവേണി വാണിയേടത്ത് മാര്‍ട്ടിന്‍ ജോര്‍ജിന്റെ ബൈക്കാണ് കാണാതായത്.
തുടര്‍ന്ന് പൊലിസ് സ്‌റ്റേഷനില്‍ പരാതി നല്‍കാന്‍ മാര്‍ട്ടിന്‍ പോകുന്നതിനിടെ രണ്ടു പേര്‍ ആക്രിക്കടയില്‍ ബൈക്ക് വില്‍ക്കാന്‍ നില്‍ക്കുന്നതായി കണ്ടു.
തുടര്‍ന്ന് ആക്രിക്കടയിലെത്തി പരിശോധിച്ചപ്പോള്‍ ഇതു തന്റെ ബൈക്കാണെന്ന് മാര്‍ട്ടിന്‍ കണ്ടെത്തി. ബൈക്ക് തിരിച്ചു നല്‍കണമെന്ന് ആവശ്യപ്പെട്ടെങ്കിലും ബൈക്കുമായി വന്നവര്‍ ഇതു നല്‍കാന്‍ തയാറായില്ല.
സ്ഥലത്തെത്തിയ പൊലിസ് ബൈക്ക് വില്‍ക്കാന്‍ ശ്രമിച്ച പാറത്തോട് പള്ളിപ്പടി പെരുമ്പള്ളി എബ്രഹാം ഐസ്‌ക്ക് (എബി 34) കാടംപറമ്പില്‍ സെല്‍വകുമാര്‍ ( കമല്‍ 41) എന്നിവരെ അറസ്റ്റ് ചെയ്തു.
കോടതിയില്‍ ഹാജരാക്കിയ ഇവരെ ജാമ്യത്തില്‍ വിട്ടയച്ചു.