കാഞ്ഞങ്ങാട്: ഭര്‍തൃമതി ആത്മഹത്യ ചെയ്ത സംഭവത്തില്‍ വ്യാജ സിദ്ധനെ ഹൊസ്ദുര്‍ഗ് പൊലിസ് അറസ്റ്റ് ചെയ്തു. കൊളവയലിലെ അബ്ദുല്‍ റഹ്മാനെ (58)യാണ് അറസ്റ്റ് ചെയ്തത്.
സ്വകാര്യ ബസ് ഡ്രൈവര്‍ പാണത്തൂരിലെ ജോമോന്റെ ഭാര്യ തസ്‌രീന(30) ജീവനൊടുക്കിയ സംഭവത്തിലാണ് അറസ്റ്റ്.
കുശാല്‍ നഗറിലെ വാടക ക്വാര്‍ട്ടേഴ്‌സിലാണ് ഒരാഴ്ച്ച മുന്‍പ് തസ്‌രീന തൂങ്ങിമരിച്ചത്. പെട്ടെന്ന് ക്ഷോഭിക്കുന്ന സ്വഭാവമുള്ള തസ്‌രീന ഇത് മാറ്റിയെടുക്കാനാണ് സിദ്ധന്റെ ചികിത്സയ്ക്ക് വിധേയയായത്. എന്നാല്‍ മന്ത്രവാദത്തിന്റെ പേരില്‍ മാനഹാനിയുണ്ടാക്കിയ വിഷമത്താലാണ് ജീവനൊടുക്കിയതെന്ന് സംശയം ഉയര്‍ന്നിരുന്നു. ദേഹത്ത് നിറങ്ങള്‍ ഉപയോഗിച്ച് കളം വരച്ചിരുന്നു. ഇതാണ് മാനഹാനിക്ക് കാരണമായി സംശയിക്കുന്നത്.
പോസ്റ്റ്‌മോര്‍ട്ടത്തില്‍ ഇത് കണ്ടെത്തിയിരുന്നു. പ്രതിയെ പൊലിസ് ചോദ്യം ചെയ്ത് വരികയാണ്. തസ്‌രീന ആത്മഹത്യ ചെയ്ത ദിവസം ക്വാര്‍ട്ടേഴ്‌സില്‍ മന്ത്രവാദം നടന്നതായി പൊലിസിന് തെളിവ് ലഭിച്ചിരുന്നു. എസ്.ഐ പി.വിജയനും സംഘവുമാണ് വ്യാജ സിദ്ധനെ അറസ്റ്റ് ചെയ്തത്.