പാണ്ടിക്കാട് റോഡില്‍ മാലാംങ്കുളത്തു മരം റോഡിലേക്കു വീണതിനെത്തുടര്‍ന്ന് ഏറെ നേരം ഗതാഗതം തടസപെട്ടു
മഞ്ചേരി: മഞ്ചേരി കോഴിക്കോട് റോഡിലെ നറുകരയില്‍ ഒടിക്കൊണ്ടിരുന്ന കാറിന്റെ മുകളിലേക്ക് മരം പൊട്ടിവീണു. ഇന്നലെ രാവിലെ ഏഴരയോടെയാണ് സംഭവം. പാണ്ടിക്കാട് ഭാഗത്തു നിന്നും കരിപ്പൂരിലേക്കു പോവുകയായിരുന്ന കാറിന്റെ ബോണറ്റിനു മുകളിലേക്കാണ് മരം വീണത്.
മരം വീഴുന്നത് കണ്ട് ഡ്രൈവര്‍ കാര്‍ നിര്‍ത്തിയതിനാല്‍ വന്‍ ദുരന്തം ഒഴിവായി. മരം പൂര്‍ണമായും പൊട്ടി വീഴാത്തതിനാല്‍ ബാക്കിഭാഗം അപകട ഭീഷണിയായി റോഡിലേക്കു ചാഞ്ഞു കിടക്കുകയാണ്. ഇതു ഏതു സമയവും റോഡിലേക്കു വീഴുമെന്ന സ്ഥിതിയാണുള്ളതെന്ന് നാട്ടുകാര്‍ പറഞ്ഞു. മഞ്ചേരി പാണ്ടിക്കാട് റോഡില്‍ മാലാംങ്കുളത്തും മരം റോഡിലേക്കു മുറിഞ്ഞുവീണു. ഇന്നലെ വൈകിട്ട് 3.30നായിരുന്നു ഇത്. പാണ്ടിക്കാട് റോഡില്‍ ഏറെനേരം ഇതുകാരണം ഗതാഗത തടസമുണ്ടായി.
മഞ്ചേരി അഗ്നിശമന സേന സ്ഥലത്തെത്തിയാണ് രണ്ട് സംഭവങ്ങളിലും മരം റോഡില്‍ നിന്നും മുറിച്ചു മാറ്റിയത്. ലീഡിങ് ഫയര്‍മാന്‍ അബ്ദുല്‍ കരീം, ഫയര്‍മാന്‍മാരായ സി. വിവിന്‍, മുഹമ്മദ് ശമീം, സുരേഷ്‌കുമാര്‍, മുഹമ്മദ് ശാഫി, രഘുറാം, നിഷാന്ത് തുടങ്ങിയവര്‍ നേതൃത്വം നല്‍കി.