ന്യൂഡല്‍ഹി: കുട്ടികളെ ആത്മഹത്യയിലേക്ക് നയിക്കുന്ന ബ്ലൂവെയില്‍ ഗെയിമിന്റെ ലിങ്ക് ഒഴിവാക്കിയതുമായി ബന്ധപ്പെട്ട വിവരം നല്‍കാന്‍ ഫെയ്‌സ്ബുക്ക്, ഗൂഗ്ള്‍, യാഹു എന്നിവയോട് ഡല്‍ഹി ഹൈക്കോടതി ഉത്തരവിട്ടു.
ഇക്കാര്യത്തില്‍ കേന്ദ്ര സര്‍ക്കാരിനോടും ഡല്‍ഹി പൊലിസിനോടും നിലപാട് വ്യക്തമാക്കാനും കോടതി ആവശ്യപ്പെട്ടിട്ടുണ്ട്. കുട്ടികള്‍ ആത്മഹത്യ ചെയ്യുന്ന പ്രവണത വര്‍ധിച്ച സാഹചര്യത്തില്‍ ഇന്റര്‍നെറ്റ് ഗെയിം നിരോധിച്ചുകൊണ്ട് കേന്ദ്രം ഉത്തരവിട്ടിരുന്നു. കുട്ടികള്‍ക്ക് പുറമെ യുവാക്കളും കൊലയാളി ഗെയിമില്‍ അകപ്പെട്ട് ആത്മഹത്യ ചെയ്യുന്ന സംഭവം റിപ്പോര്‍ട്ട് ചെയ്യപ്പെട്ട സാഹചര്യത്തില്‍ ഇതുസംബന്ധിച്ച ഹരജിയില്‍ ഡല്‍ഹി ഹൈക്കോടതി ചീഫ് ജസ്റ്റിസ് ഗീതാ മിത്തലും ജസ്റ്റിസ് സി. ഹരിശങ്കറും ഉത്കണ്ഠ രേഖപ്പെടുത്തിയിരുന്നു.