വാടാനപ്പള്ളി: പൊലിസിന്റെ മൂന്നാം മുറയെ തുടര്‍ന്ന് ജീവനൊടുക്കിയ ഏങ്ങണ്ടിയൂര്‍ സ്വദേശി വിനായകിന്റെ കുടുംബത്തിന് അയ്യായിരം രൂപ പെന്‍ഷനും ചികിത്സാ സഹായവും നല്‍കണമെന്ന് ദേശീയ പട്ടിക ജാതി കമ്മിഷന്‍. ചെയര്‍മാന്‍ രാംശങ്കര്‍ ഖഠാരിയ, വൈസ് ചെയര്‍മാന്‍ എല്‍.മുരുകന്‍ എന്നിവര്‍ ആണ് കമ്മിഷന്‍ നിലപാട് വ്യക്തമാക്കിയത്. രണ്ടേക്കര്‍ കൃഷിഭൂമിയും അനുവദിക്കണം. കുടുംബത്തിലെ ഒരാള്‍ക്ക് സര്‍ക്കാര്‍ ജോലി നല്‍കണം, വിനായകിന്റെ സഹോദരന്‍ വിഷ്ണുപ്രസാദിന് ബിരുദ പഠനത്തിന് സഹായം ലഭ്യമാക്കണം, അമ്പത് ലക്ഷം രൂപ നഷ്ടപരിഹാരം നല്‍കണം എന്നീ ഈ ആറ് നിര്‍ദേശങ്ങളാണു കമ്മിഷന്‍ മുന്നോട്ട് വച്ചത്. ഇതിനായി നടപടി ആരംഭിക്കുമെന്നും കമ്മിഷന്‍ പറഞ്ഞു.
ഇന്നലെ രാവിലെ ഏങ്ങണ്ടിയൂരിലെ വിനായകിന്റെ വീട്ടിലെത്തി മാധ്യമ പ്രവര്‍ത്തരോട് സംസാരിക്കുകയായിരുന്നു അദ്ദേഹം. കേസന്വേഷണത്തിന്റെ പുരോഗതി ഉന്നതോദ്യോഗസ്ഥരുമായി സംസാരിക്കുമെന്നും കമ്മിഷന്‍ പറഞ്ഞു. വിനായക് പൊലിസ് കസ്റ്റഡിയിലായിരിക്കെ, പാവറട്ടി പൊലിസ് സ്റ്റേഷനില്‍ ഡ്യൂട്ടിയിലുണ്ടായിരുന്ന സി.ഐ, എസ്.ഐ എന്നിവര്‍ക്കെതിരേ നടപടി എടുക്കേണ്ടതു സംബന്ധിച്ച് ഡി.ജി.പിയുമായി സംസാരിക്കുമെന്നും കമ്മിഷന്‍ വ്യക്തമാക്കി. ജില്ലാ കലക്ടര്‍ എ.കൗശികന്‍, ആര്‍.ഡി.ഒ കെ.അജീഷ്, തൃശൂര്‍ റൂറല്‍ എസ്.പി ജി.എച്ച് യതീശ് ചന്ദ്ര, സിറ്റി പൊലിസ് കമ്മിഷണര്‍ രാഹുല്‍ കെ.നായര്‍, ചാവക്കാട് തഹസില്‍ദാര്‍ കെ.വി അംബ്രോസ്, വലപ്പാട് സി.ഐ സി.ആര്‍ സന്തോഷ്, പഞ്ചായത്തംഗങ്ങളായ ഉഷ സുകുമാരന്‍, പി.വി സുരേഷ് എന്നിവരും കൂടെ ഉണ്ടായിരുന്നു.