മുംബൈ: ത്രിരാഷ്ട്ര ഫുട്‌ബോള്‍ പോരാട്ടത്തില്‍ ഇന്ത്യ ജേതാക്കള്‍. രണ്ടാം മത്സരത്തില്‍ സെന്റ് കിറ്റ്‌സ് ആന്‍ഡ് നെവിസിനെ സമനിലയില്‍ പിടിച്ചാണ് ഇന്ത്യ ജേതാക്കളായത്. രണ്ടാം മത്സരം 1-1ന് സമനിലയില്‍ അവസാനിക്കുകയായിരുന്നു. നേരത്തെ ആദ്യ മത്സരത്തില്‍ ഇന്ത്യ മൗറീഷ്യസിനെ 2-1ന് പരാജയപ്പെടുത്തിയിരുന്നു.
സെന്റ് കിറ്റ്‌സിനെതിരേ കളിയുടെ 38ാം മിനുട്ടില്‍ ജാക്കിചന്ദ് സിങിന്റെ ഗോളില്‍ ഇന്ത്യ മുന്നിലെത്തി. എന്നാല്‍ 72ാം മിനുട്ടില്‍ ജിവുനെ അമോരി സെന്റ് കിറ്റ്‌സിനെ ഒപ്പമെത്തിച്ചു. രണ്ടാം ഗോള്‍ നേടി വിജയിക്കാനുള്ള ഇന്ത്യന്‍ തന്ത്രം ഫലം കാണാതെ പോയതോടെ പോരാട്ടം തുല്ല്യതയില്‍ പിരിയുകയായിരുന്നു. എ.എഫ്.സി ഏഷ്യന്‍ കപ്പ് യോഗ്യതാ പോരാട്ടത്തിനിറങ്ങാനൊരുങ്ങുന്ന ഇന്ത്യക്ക് മികച്ച ആത്മവിശ്വാസം സമ്മാനിക്കുന്നതാണ് കിരീട വിജയം.