തിരുവനന്തപുരം: ജില്ലാ കലക്ടര്‍ എസ്. വെങ്കിടേസപതിക്ക് കുടപ്പനക്കുന്ന് കലക്ടറേറ്റ് കോണ്‍ഫറന്‍സ് ഹാളില്‍ യാത്രയയപ്പ് നല്‍കി. പാവങ്ങളെ സഹായിക്കാനും അശരണരായവര്‍ക്ക് ആശ്വാസം എത്തിക്കാനുമുള്ള അവസരമാണ് സര്‍ക്കാര്‍ ജോലിയെന്ന് അദ്ദേഹം പറഞ്ഞു. കഴിഞ്ഞ ഒരു വര്‍ഷക്കാലം ജില്ലയില്‍ നടത്തിയ പ്രവര്‍ത്തനങ്ങളിലും ജീവനക്കാരുടെ പങ്കാളിത്തത്തിലും സന്തുഷ്ടനാണെന്നും കലക്ടര്‍ അറിയിച്ചു.
ഫിഷറീസ്, ലോട്ടറി വകുപ്പുകളുടെ ഡയറക്ടറായി അദ്ദേഹം ഇന്ന് ചുമതലയേല്‍ക്കും. യോഗത്തില്‍ എ.ഡി.എം ജോണ്‍ വി. സാമുവല്‍, ഡെപ്യൂട്ടി കലക്ടര്‍മാരായ വി.ആര്‍ വിനോദ്, എസ്.ജെ വിജയ, ജെ. ദേവപ്രസാദ്, സവിത. പി, ഇന്‍ഫര്‍മേഷന്‍ പബ്ലിക് റിലേഷന്‍സ് അസിസ്റ്റന്റ് എഡിറ്റര്‍ ജി. ബിന്‍സിലാല്‍, റിക്രിയേഷന്‍ ക്ലബ് ഭാരവാഹികളായ രാജേഷ്, സന്തോഷ് തുടങ്ങിയവര്‍ സംസാരിച്ചു.