വേങ്ങര: 'നമസ്‌ക്കാരം.., കുറ്റൂര്‍ നോര്‍ത്ത് കെ.എം.എച്ച്.എസ്.എസ് ന്യൂസ് ബുള്ളറ്റിനിലേക്ക് സ്വാഗതം'. സ്‌കൂളിലും പരിസരത്തും നടക്കുന്ന വിവിധ പരിപാടികളുടെ വാര്‍ത്തകള്‍ ഉള്‍പ്പെടുത്തി കുറ്റൂര്‍ നോര്‍ത്ത് കെ.എം.എച്ച്.എസ്.എസ് ഹയര്‍ സെക്കന്‍ഡറി സോഷ്യോളജി ക്ലബ് നിര്‍മിച്ച വീഡിയോ വാര്‍ത്താ ബുള്ളറ്റിന് സാമൂഹ്യമാധ്യമങ്ങളില്‍ വന്‍ സ്വീകരണം.
വിദ്യാര്‍ഥികള്‍ തന്നെ റിപ്പോര്‍ട്ടിങ്, കാമറ, എഡിറ്റിങ്, ന്യൂസ് റീഡിങ് എന്നിവ നിര്‍വഹിച്ച് സ്വന്തം അക്കൗണ്ടില്‍ നിന്ന് വാട്ട്‌സാപ്പ്, ഫേസ്ബുക്ക് പോലുള്ള സാമൂഹ്യമാധ്യമങ്ങളിലൂടെയാണ് വാര്‍ത്ത ജനങ്ങളിലേക്കെത്തിക്കുന്നത്. പി.കെ ഷഹബാസ് ബാനു വാര്‍ത്ത അവതരിപ്പിച്ചു.
സ്‌കൂള്‍ മാനേജര്‍ കെ.പി കുഞ്ഞിമൊയ്തു വീഡിയോ ഫെയ്‌സ് ബുക്കില്‍ അപ് ലോഡ് ചെയ്ത് ഉദ്ഘാടനം നിര്‍വഹിച്ചു. ന്യൂസ് റൂം പ്രവര്‍ത്തനങ്ങള്‍ക്ക് സോഷ്യോളജി ക്ലബ് കണ്‍വീനര്‍ എം.കെ ഫവാസ്, പി ലുബ്‌ന, പി അഫീഫ, പി സ്വാതി, പി.പി മുര്‍ഷിദ നേതൃത്വം നല്‍കി. അധ്യാപകരായ കെ.പി.എം അസ്‌ലം, വിജയന്‍ കണ്ടമ്പത്ത്, ഗ്ലോറി, കെ ഷൈജു, ബി ലിജിന്‍ ചടങ്ങില്‍ പങ്കെടുത്തു.
മണിക്കൂറുകള്‍ക്കകം അനേകം പേര്‍ ഈ വാര്‍ത്താ വീഡിയോ ഫെയ്‌സ് ബുക്കില്‍ കണ്ടു. ഒരു പാട് പേര്‍ ഷെയര്‍ ചെയ്യുകയും ചെയ്തു. ഓരോ മാസവും വിവിധ എപ്പിസോഡുകളായി വാര്‍ത്താ ബുള്ളറ്റിന്‍ നിര്‍മിക്കാനാണ് വിദ്യാര്‍ഥികളുടെ തീരുമാനം.