നീലേശ്വരം: നീലേശ്വരം കേന്ദ്രീയ വിദ്യാലയത്തില്‍ ക്ലാസുകള്‍ തുടങ്ങാനുള്ള നടപടികള്‍ അവസാന ഘട്ടത്തില്‍. ജില്ലയില്‍ അനുവദിച്ച നാലാമത്തെ കേന്ദ്രീയ വിദ്യാലയത്തില്‍ ഈ വര്‍ഷം തന്നെ ക്ലാസ് തുടങ്ങാനുള്ള തീവ്രശ്രമത്തിലാണു കേന്ദ്രീയ വിദ്യാലയ സ്‌പോണ്‍സറിങ് കമ്മിറ്റി. സ്‌കൂളിനായി പേരോല്‍ വില്ലേജില്‍ പാലാത്തടത്തെ കണ്ണൂര്‍ സര്‍വകലാശാല ഡോ.പി.കെ രാജന്‍ സ്മാരക കാംപസിനു സമീപമാണു സ്‌കൂളിനായി സംസ്ഥാന റവന്യൂ വകുപ്പ് ഏഴേക്കര്‍ സ്ഥലം അനുവദിച്ചത്. എന്നാല്‍ ഭൂമിയുടെ വില നിശ്ചയിച്ചതില്‍ കേന്ദ്രീയ വിദ്യാലയ സംഘടന്റെ ആവശ്യപ്രകാരം പിന്നീടു വരുത്തിയ ക്രമീകരണങ്ങള്‍ ഇതു സംബന്ധിച്ച നടപടികളുടെ വേഗത കുറച്ചു. ആദ്യം 30 വര്‍ഷത്തേക്കു നല്‍കിയ ലീസ് 99 വര്‍ഷമായി പുതുക്കി നല്‍കണമെന്നും സംഘടന്‍ ആവശ്യപ്പെട്ടു.
ഇതു സംബന്ധിച്ചു പ്രതിസന്ധിയുണ്ടായതോടെ നീലേശ്വരം നഗരസഭാ അധ്യക്ഷന്‍ പ്രഫ.കെ.പി ജയരാജന്‍ ചെയര്‍മാനും പി. സുനില്‍കുമാര്‍ കണ്‍വീനറുമായ വിദ്യാലയ സ്‌പോണ്‍സറിങ് കമ്മിറ്റി മന്ത്രി ഇ. ചന്ദ്രശേഖരനെ സമീപിച്ചു. മന്ത്രി ഇടപെട്ട് കേന്ദ്രീയ വിദ്യാലയ സംഘടന്‍ ആവശ്യപ്പെട്ടതു പ്രകാരം ഭൂമിയുടെ വിലയിലും ലീസ് കാലാവധിയിലും പുനഃക്രമീകരണങ്ങള്‍ വരുത്തി. ഇതുസംബന്ധിച്ച ഫയലുമായി സ്‌പോണ്‍സറിങ് കമ്മിറ്റി കണ്‍വീനര്‍ പി. സുനില്‍കുമാര്‍ കേന്ദ്രീയ വിദ്യാലയ സംഘടന്‍ ആസ്ഥാനമായ ദല്‍ഹിയിലേക്കു പുറപ്പെടുകയും ചെയ്തു. 31 നകം ഇതിന് അംഗീകാരം നേടിയെടുത്ത് ഈ വര്‍ഷം തന്നെ ക്ലാസ് തുടങ്ങാനുള്ള അവസാനശ്രമത്തിലാണ് കമ്മിറ്റി.