കൂത്തുപറമ്പ്: കൂത്തുപറമ്പിനു സമീപം നിര്‍മ്മലഗിരിയില്‍ ഇതരസംസ്ഥാന തൊഴിലാളി കൊല്ലപ്പെട്ട നിലയില്‍. സിമന്റ് ഗോഡൗണില്‍ തൊഴിലാളിയായ പശ്ചിമ ബംഗാള്‍ ജല്പാഗുരു സ്വദേശി തുളസി (28)യാണ് മരിച്ചത്.

മദ്യലഹരിയിലുണ്ടായ വാക്കുതര്‍ക്കത്തെ തുടര്‍ന്ന് സഹ തൊഴിലാളിയായ പശ്ചിമ ബംഗാള്‍ സ്വദേശിയായ യുവാവ് ഇയാളെ ചുമരിലിടിച്ച് കൊലപ്പെടുത്തുകയായിരുന്നുവെന്ന് പൊലിസ് പറഞ്ഞു. കൊലപാതക കൃത്യം നടത്തിയെന്നു സംശയിക്കുന്ന ദാരു കാറനെ (43) പൊലിസ് കസ്റ്റഡിയിലെടുത്തു.

ഞായറാഴ്ച രാത്രി പന്ത്രണ്ടോടെയായിരുന്നു സംഭവം. ഇടിയുടെ ആഘാതത്തില്‍ തുളസിയുടെ വാരിയെല്ല്, താടിയെല്ല് എന്നിവയ്ക്ക് ഗുരുതരമായ ക്ഷതം പറ്റിയിരുന്നു.

പരുക്കേറ്റ തുളസിയെ ഉടന്‍ കൂത്തുപറമ്പ്, താലൂക്കാശുപത്രിയിലും തുടര്‍ന്ന് തലശ്ശേരി ജനറല്‍ ആശുപത്രിയിലും എത്തിച്ചെങ്കിലും രക്ഷിക്കാനായില്ല.

കുത്തുപറമ്പ് സി.ഐ. പ്രദീഷ്, എസ്.ഐ. കെ.വി.നിഷിത്ത് എന്നിവരുടെ നേതൃത്വത്തില്‍ പൊലിസ് സ്ഥലത്തെത്തി അന്വേഷണം നടത്തി.