വളപട്ടണം: രാത്രിയില്‍ ജോലി കഴിഞ്ഞ് വീട്ടിലേക്ക് പോകുന്നതിന് ബൈക്കില്‍ ലിഫ്റ്റ് ചോദിച്ച് കയറിയയാളെ മര്‍ദിച്ച് അവശനാക്കി സ്വര്‍ണവും പണവും കവര്‍ന്ന കേസില്‍ രണ്ടുപേര്‍ പിടിയില്‍. പാപ്പിനിശ്ശേരി ഗേറ്റിന് സമീപത്തെ കുടുങ്ങള്‍ ഹൗസില്‍ സജീര്‍ (32), പയ്യന്നൂര്‍ തോട്ടന്‍കടവ് കാനായിലെ ചെങ്ങ ഹൗസില്‍ സിറാജുദ്ദീന്‍ (29) എന്നിവരെയാണ് വളപട്ടണം എസ്.ഐ ശ്രീജിത്ത് കൊടേരിയും സംഘവും ഇന്നലെ അറസ്റ്റ് ചെയ്തത്. കണ്ണൂര്‍ അനശ്വര സില്‍ക്ക് വസ്ത്രവ്യാപാര കേന്ദ്രത്തിലെ ജീവനക്കാരന്‍ കൊയിലേരിയന്‍ ഹൗസില്‍ സിജിത്താണ് അക്രമണത്തിനിരയായത്. ഈ മാസം 24ന് സ്ഥാപനത്തില്‍ നിന്നു ജോലി കഴിഞ്ഞ് വീട്ടിലേക്കു പോകുന്നതിനു വേണ്ടി രാത്രി പത്തു മണിയോടെ എ.കെ.ജി ആശുപത്രിക്കടുത്ത് നില്‍ക്കുമ്പോഴാണ് സിജിത്ത് പ്രതികള്‍ സഞ്ചരിച്ച ബൈക്കിന് കൈകാണിക്കുന്നത്. തുടര്‍ന്ന് ബൈക്കില്‍ കയറിയ സിജിത്തിനെ വളപട്ടണം പാലത്തിന് സമീപം പഴയങ്ങാടി ജങ്ഷനില്‍ പാപ്പിനി
ശ്ശേരി കോട്ടന്‍സ് റോഡിന് സമീപത്ത് വെച്ച് മര്‍ദിച്ചവശനാക്കി ഒന്നര പവന്‍ സ്വര്‍ണ മാലയും 2600 രൂപയും മൊബൈല്‍ ഫോണും കവര്‍ച്ച ചെയ്യുകയായിരുന്നു. സിജിത്തിന്റെ പരാതിയുടെ അടിസ്ഥാനത്തില്‍ പൊലിസ് നടത്തിയ അന്വേഷണത്തിലാണ് പ്രതികളെ പിടികൂടുന്നത്. കവര്‍ച്ച ചെയ്ത സ്വര്‍ണമാല കണ്ണൂരിലെ ഒരു പ്രമുഖ ജ്വല്ലറിയില്‍ 28500 രൂപക്ക് വിറ്റത് പൊലിസ് കണ്ടെടുക്കുകയും ചെയ്തു. പ്രതികള്‍ സഞ്ചരിച്ച പള്‍സര്‍ ബൈക്കും പൊലിസ് പിടിച്ചെടുത്തു. ഇവരെ കണ്ണൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു.