വടക്കാഞ്ചേരി: വാഴാനി വിനോദ സഞ്ചാര കേന്ദ്രം ഓണം വാരാഘോഷത്തിന് ഒരുങ്ങി. തെക്കുംകര പഞ്ചായത്തും വാഴാനി ടൂറിസം ഡെസ്റ്റിനേഷന്‍ കമ്മിറ്റിയും സംയുക്തമായാണ് ഏഴു ദിവസം നീണ്ടുനില്‍ക്കുന്ന പരിപാടികള്‍ സംഘടിപ്പിക്കുന്നത്.
ദീപാലങ്കാരം, മെഗാ തിരുവാതിര, സാഹസിക വിനോദങ്ങള്‍, അമ്യൂസ്‌മെന്റ് പാര്‍ക്ക്, ഗ്രാമോത്സവം, വൈക്കം വിജയലക്ഷ്മി നയിക്കുന്ന സംഗീതനിശ, മെഗാഷോ നാടകം, ഫ്യൂഷന്‍, നാടന്‍പാട്ട്, മാജിക് ഷോ, ഗാനമേള എന്നിവയ്‌ക്കൊപ്പം നാടന്‍ ഭക്ഷ്യമേളയും സംഘടിപ്പിച്ചിട്ടുണ്ട്. രണ്ടിന് വൈകീട്ട് ആറിന് ദീപാലങ്കാരത്തിന്റെ സ്വിച്ച് ഓണ്‍ കര്‍മ്മം ജില്ലാ പഞ്ചായത്ത് മെമ്പര്‍ മേരി തോമാസ് നിര്‍വ്വഹിയ്ക്കും.
മൂന്നിന് കാലത്ത് 10.30 നാണ് മെഗാ തിരുവാതിര, തുടര്‍ന്ന് വ്യവസായ വകുപ്പ് മന്ത്രി എ.സി മൊയ്തീന്‍ വാരാഘോഷം ഉദ്ഘാടനം ചെയ്യും .
അനില്‍ അക്കര എം.എല്‍.എ അധ്യക്ഷത വഹിയ്ക്കും. ഒന്‍പതിന് വൈകീട്ട് അഞ്ചിന് നടക്കുന്ന സമാപന സമ്മേളനം ഡോ. പി.കെ ബിജു എം.പി ഉദ്ഘാടനം ചെയ്യും.