മട്ടാഞ്ചേരി: ആള്‍ താമസമില്ലാത്ത വീടുകളില്‍ നിരീക്ഷണം നടത്തി അവസരം നോക്കി കുത്തിത്തുറന്ന് മോഷണം നടത്തുന്ന രണ്ടംഗ സംഘം ഫോര്‍ട്ട്‌കൊച്ചി പൊലിസിന്റെ പിടിയിലായി. മട്ടാഞ്ചേരി ചെറളായിക്കടവില്‍ അന്‍സാം(20), മട്ടാഞ്ചേരി ജൂതന്‍ പറമ്പില്‍ ബിലാല്‍ എന്ന് വിളിക്കുന്ന നിസാമുദ്ദീന്‍(18) എന്നിവരെയാണ് ഫോര്‍ട്ട്‌കൊച്ചി എസ്.ഐ.എസ്.ദ്വിജേഷിന്റെ നേതൃത്വത്തില്‍ അറസ്റ്റ് ചെയ്തത്.
ഫോര്‍ട്ട്‌കൊച്ചി വൈ.എം.സി.എ.റോഡിലുള്ള ചിരട്ടപ്പാലം സ്വദേശിനി മറിയം ബീവിയുടെ പൂട്ടി കിടന്ന വീട്ടില്‍ നിന്നും ടി.വി,മിക്‌സി, മോട്ടോര്‍, ഫാനുകള്‍, ചെമ്പ് പൈപ്പുകള്‍, തയ്യല്‍ മിഷ്യന്‍ തുടങ്ങിയവ മോഷ്ടിച്ച കേസിലാണ് പ്രതികള്‍ പിടിയിലായത്.
മോഷണ മുതലുകള്‍ ഫോര്‍ട്ട്‌കൊച്ചിയിലെ ആക്രി കടയില്‍ നിന്നും പൊലീസ് കണ്ടെടുത്തു.മോഷണം മുതലുകള്‍ വിറ്റ് കിട്ടുന്ന പണം പ്രതികള്‍ ആര്‍ഭാട ജീവിതത്തിന് ഉപയോഗിക്കുകയാണെന്ന് പൊലിസ് പറഞ്ഞു. അന്‍സാമിനെതിരെ ലഹരി കേസും നിലവിലുണ്ട്.
സീനിയര്‍ സിവില്‍ പൊലിസ് ഓഫീസര്‍ മനാഫ്,സിവില്‍ പൊലീസ് ഓഫീസറായ എം എ ജോണ്‍ എന്നിവരും പ്രതികളെ പിടികൂടിയ സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.