നെടുങ്കണ്ടം: കനത്ത മഴയെത്തുടര്‍ന്ന് കവുന്തിയില്‍ മണ്ണിടിഞ്ഞ് ഗതാഗതം ഭാഗികമായി തടസപ്പെട്ടു. ഇന്നലെ രാവിലെയാണ് കുമരകം-കമ്പം സംസ്ഥാന പാതയിലെ കവുന്തിയില്‍ മണ്ണിടിഞ്ഞത്. ഓട്ടോറിക്ഷകള്‍ പാര്‍ക്ക് ചെയ്തിരുന്ന സ്ഥലത്തേക്കാണ് മണ്ണ് ഇടിഞ്ഞു വീണത്. ഓട്ടോറിക്ഷകള്‍ സ്റ്റാന്‍ഡില്‍ ഇല്ലാതെയിരുന്നതിനാല്‍ വന്‍ അപകടം ഒഴിവായി. സമീപത്ത് യാത്രക്കാരും ഉണ്ടായിരുന്നില്ല. മണ്ണും കല്ലും റോഡിലേക്ക് വീണതിനെത്തുടര്‍ന്നാണ് ഗതാഗത തടസം അനുഭവപ്പെട്ടത്.
കനത്ത മഴയില്‍ കട്ടപ്പന സ്റ്റേഡിയത്തിന്റെ ഭിത്തി തകര്‍ന്നു. ഭിത്തി തകര്‍ന്ന് റോഡിലേക്ക് പതിച്ചതിനെ തുടര്‍ന്ന് മണിക്കൂറുകളോളം ഇതുവഴിയുള്ള ഗതാഗതം തടസപ്പെട്ടു. സൈഡുകള്‍ ഇടിഞ്ഞതോടെ കരിങ്കല്‍ വെച്ചും റിബണ്‍ വലിച്ച് കെട്ടിയും അപകട സൂചന നല്‍കിയിട്ടുണ്ട്. മഴ തുടര്‍ന്നാല്‍ ഇനിയും റോഡ് ഇടിയുവാനുള്ള സാധ്യതയുണ്ട്. വീടിനു മുകളിലേയ്ക്ക് മണ്ണിടിഞ്ഞുവീണ് കട്ടപ്പന കാണക്കാലിപ്പടിക്കു സമീപം വാഴയില്‍ പി.വി സ്‌കറിയയുടെ വീടിന്റെ പിന്‍ഭാഗം പൂര്‍ണമായി തകര്‍ന്നു. പുലര്‍ച്ചെ രണ്ടോടെയാണ് അപകടം. വീട്ടില്‍ വാടകയ്ക്കു താമസിച്ചിരുന്ന താന്നിക്കപ്പാറ ലോറന്‍സും കുടുംബവും പരുക്കേല്‍ക്കാതെ അത്ഭുതകരമായി രക്ഷപെട്ടു. സംഭവസ്ഥലം സന്ദര്‍ശിച്ച് കട്ടപ്പന വില്ലേജ് അധികൃതര്‍ മേല്‍നടപടി സ്വീകരിച്ചു. രണ്ടു ദിവസമായി ജില്ലയില്‍ കനത്തമഴ തുടരുകയാണ്. ഇടവിട്ട് ഇടവിട്ട് പെയ്യുന്ന മഴ ഉരുള്‍പൊട്ടല്‍ ഭീഷണിയും ഉയര്‍ത്തുന്നുണ്ട്.