തലശ്ശേരി: കനത്ത മഴയില്‍ മുങ്ങി പൂ വിപണി. കര്‍ണാടകത്തില്‍ പെയ്ത അപ്രതീക്ഷിത മഴ മലബാറില്‍ എത്തുന്ന പൂക്കളുടെ വരവില്‍ ഗണ്യമായ കുറവിനു കാരണം. എത്തുന്ന പൂക്കള്‍ക്ക് തീപിടിച്ച വിലയുമായി. ജമന്തി, ചെണ്ടുമല്ലി, വാടാര്‍മല്ലി, അരളി എന്നിവയാണ് കര്‍ണാടകത്തില്‍ നിന്നു മാര്‍ക്കറ്റില്‍ എത്തുന്നത്. ഒരു കിലോ വാടാര്‍മല്ലിക്ക് 250, ജമന്തി 350, അരളി 350 എന്നിങ്ങനെയാണ് അതിര്‍ത്തി കടന്നെത്തുമ്പോഴുള്ള വില. കഴിഞ്ഞ വര്‍ഷത്തെ അപേക്ഷിച്ച് കിലോയ്ക്ക് 70 മുതല്‍ 100 രൂപ വരെ വര്‍ധനവുണ്ടായിട്ടുണ്ട്. പരമ്പരാഗത പൂ വില്‍പ്പന സ്റ്റാളുകളില്‍ തിരക്കുണ്ടെങ്കിലും കനത്ത വില വര്‍ധനവ് ആവശ്യക്കാരെ മാറ്റിനിര്‍ത്തുന്നു. കര്‍ണാടകത്തിനു പുറമേ തമിഴ്‌നാട്ടിലെ കോയമ്പത്തൂര്‍, സേലം എന്നിവിടങ്ങളില്‍ നിന്നും തലശ്ശേരി ഉള്‍പ്പെടെയുള്ള സ്ഥലങ്ങളില്‍ പൂ എത്തുന്നുണ്ട്. കര്‍ണാടകത്തിലെ വന്‍കിട പൂപാടങ്ങള്‍ ബഹുരാഷ്ട്ര കമ്പനികള്‍ പെയിന്റ് ആവശ്യത്തിന് മൊത്തമായി വിലക്കെടുക്കുന്നതും പൂ വിപണിയെ പ്രതികൂലമായി ബാധിച്ചിട്ടുണ്ട്. നേരത്തെ സംസ്ഥാന സര്‍ക്കാറിന്റെ വിവിധ പദ്ധതികളുടെ ഭാഗമായി ചെണ്ടുമല്ലി, ജമന്തി, പിച്ചി, മുല്ല എന്നിവ കൃഷി ചെയ്യുന്നുണ്ടെങ്കിലും വിപണി അടിസ്ഥാനത്തില്‍ മാര്‍ക്കറ്റില്‍ എത്തിക്കാന്‍ മാത്രം കൃഷി രീതികള്‍ വളര്‍ന്നില്ല. ഓണത്തോടടുത്ത് കൂടുതല്‍ പൂക്കള്‍ കേരളത്തില്‍ എത്തുകയാണെങ്കില്‍ വില കുറയാന്‍ സാധ്യത ഉണ്ടെന്നു തലശ്ശേരിയിലെ പൂക്കച്ചവടക്കാര്‍ പറയുന്നു.