കണ്ണൂര്‍: ഇന്ത്യയുടെ പൊലിസ് സംവിധാനത്തിലെ മികച്ച മാതൃകയാണ് കേരള പൊലിസെന്ന് മുന്‍ ഡി.ജി.പിയും നോഡല്‍ ഓഫിസറുമായ ഡോ. അലക്‌സാണ്ടര്‍ ജേക്കബ്. കേരളാ പൊലിസ് ഓഫിസേഴ്‌സ് അസോ., കേരളാ പൊലിസ് അസോസിയേഷന്‍ ജില്ലാ കമ്മിറ്റി ആഭിമുഖ്യത്തില്‍ കേരളം ഇന്ത്യക്ക് വഴികാട്ടി-കേരള പൊലിസിന്റെ പങ്ക് എന്ന വിഷയത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. സാധാരണക്കാരനു പോലും കേസ് കൊടുക്കാന്‍ സാധിക്കുന്നതുകൊണ്ടാണ് കേരളത്തില്‍ കേസുകള്‍ വര്‍ധിക്കുന്നത്. ഇതു കേരള പൊലിസിന്റെ മികവാണ് തെളിയിക്കുന്നത്.
രാഷ്ട്രീയ കൊലപാതകങ്ങളില്‍ കേരളം മുന്നിലാണെന്ന് ചിലരും ചില മാധ്യമങ്ങളും കള്ളപ്രചാരണം നടത്തുകയാണ്. യഥാര്‍ഥത്തില്‍ ഉത്തരേന്ത്യന്‍ സംസ്ഥാനങ്ങളായ യു.പി, ജാര്‍ഖണ്ഡ്, മഹാരാഷ്ട്ര തുടങ്ങിയ സംസ്ഥാനങ്ങള്‍ക്കു ശേഷമാണ് കേരളമെന്നും അദ്ദേഹം പറഞ്ഞു.
സെമിനാര്‍ കെ.കെ രാഗേഷ് എം.പി ഉദ്ഘാടനം ചെയ്തു. കേരളത്തില്‍ ആള്‍ ദൈവങ്ങള്‍ക്കെതിരേ കേസുകള്‍ ഉണ്ടായപ്പോള്‍ പ്രതിഷേധം എവിടെയും ഉണ്ടായിട്ടില്ലെന്നും എന്നാല്‍ ഇപ്പോള്‍ വടക്കെ ഇന്ത്യയിലെ സംസ്ഥാനങ്ങളില്‍ എന്തൊക്കെയാണ് ഉണ്ടായതെന്ന് കണ്ടതാണെന്നും അദ്ദേഹം പറഞ്ഞു. കെ.പി.ഒ.എ ജില്ലാ പ്രസിഡന്റ് ടി.കെ രത്‌നകുമാര്‍ അധ്യക്ഷനായി.
സെക്രട്ടറി കെ. രാജേഷ്, കണ്ണൂര്‍ ഡിവൈ.എസ്.പി പി.പി സദാനന്ദന്‍, കെ. മധു, പി.വി കുട്ടന്‍, ഷാജന്‍ സി. മാത്യു, സി.ആര്‍ ബിജു, പി.ജി അനില്‍ കുമാര്‍, ടി. പ്രജീഷ് സംസാരിച്ചു.