നാദാപുരം: വാഹന പരിശോധനയ്ക്കിടെ വിദേശമദ്യവുമായി മധ്യവയസ്‌കനെ പിടികൂടി. കായക്കൊടി വെണ്ടയംകോട്ചാലില്‍ ശങ്കരന്‍(58) ആണ് എക്‌സൈസിന്റെ പിടിയിലായത്. ഇയാളില്‍ നിന്ന് 54 കുപ്പി മദ്യം സംഘം പിടിച്ചെടുത്തു.
ഇന്നലെ ഉച്ചയ്ക്ക് പാറക്കടവ് ഗ്രാമപഞ്ചായത്തിനു സമീപം വാഹന പരിശോധന നടത്തുകയായിരുന്ന വടകര സര്‍ക്കിള്‍ ഇന്‍സ്‌പെക്ടര്‍ ആര്‍.എന്‍ ബൈജുവിന്റെ നേതൃത്വത്തിലുള്ള സംഘമാണു രഹസ്യവിവരത്തെ തുടര്‍ന്ന് ശങ്കരനെ പിടികൂടിയത്.
മാഹിയില്‍ നിന്ന് ബസ് മാര്‍ഗം കൊണ്ടുവന്ന് പാറക്കടവില്‍ തലച്ചുമടായി കൊണ്ടുപോകുന്നതിനിടെയാണ് ഇയാളില്‍ നിന്നു മദ്യം പിടികൂടിയത്. പ്രതി നേരത്തെ മദ്യക്കടത്തിനു ജയിലിലായിട്ടുണ്ടെന്ന് എക്‌സൈസ് ഉദ്യോഗസ്ഥര്‍ പറഞ്ഞു. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.