കുറ്റ്യാടി: സ്‌കൂള്‍ പാര്‍ലമെന്റ് തെരഞ്ഞെടുപ്പു വിജയം അവകാശപ്പെട്ട് കെ.എസ്.യു, എം.എസ്.എഫ് പ്രവര്‍ത്തകര്‍ ചേരിതിരിഞ്ഞു നടത്തിയ ആഹ്ലാദ പ്രകടനം ടൗണില്‍ സംഘര്‍ഷാവസ്ഥ സൃഷ്ടിച്ചു.
കുറ്റ്യാടി ഗവ. ഹയര്‍ സെക്കന്‍ഡറി സ്‌കൂള്‍ തെരഞ്ഞെടുപ്പില്‍ മുഴുവന്‍ സീറ്റിലും വിജയിച്ചതു തങ്ങളാണെന്നു പറഞ്ഞ് കെ.എസ്.യു പ്രവര്‍ത്തകര്‍ നടത്തിയ പ്രകടനത്തിനു പിന്നാലെ മുഴുവന്‍ സീറ്റിലും വിജയം അവകാശപ്പെട്ടു നൂറോളം എം.എസ്.എഫ് പ്രവര്‍ത്തകരും ടൗണില്‍ പ്രകടനം നടത്തുകയായിരുന്നു. ഇരുവിഭാഗവും പ്രകോപനപരമായ മുദ്രാവാക്യങ്ങള്‍ വിളിച്ചായിരുന്നു പ്രകടനം നടത്തിയത്. തുടര്‍ന്ന്, പ്രകടനം മുതിര്‍ന്ന നേതാക്കള്‍ ഇടപെട്ട് അവസാനിപ്പിക്കുകയായിരുന്നു.
ചെയര്‍പേഴ്‌സനായി എം.എസ്.എഫിലെ നസ്ത നബിത, ജനറല്‍ സെക്രട്ടറിയായി നാജിയ എന്നിവരെ തെരഞ്ഞെടുക്കുകയും സ്‌കൂളിലെ പത്ത് സീറ്റിലും എം.എസ്.എഫ് വിജയം നേടുകയും ചെയ്തതായി എം.എസ്.എഫ് ഭാരവാഹികള്‍ അവകാശപ്പെട്ടു. വിജയം തട്ടിയെടുക്കാന്‍ കെ.എസ്.യു പ്രവര്‍ത്തകര്‍ ശ്രമിക്കുകയാണെന്നും ഭാരവാഹികള്‍ ആരോപിച്ചു.