ഇരിങ്ങാലക്കുട : കര്‍ണാടകയിലെ മുതിരിപന്ന മാധ്യമ പ്രവര്‍ത്തകയും സാമൂഹ്യ പ്രവര്‍ത്തകയുമായ ഗൗരിലങ്കേഷിന്റെ കൊലപാതകത്തില്‍ എ.ഐ.വൈ.എഫ് ഇരിങ്ങാലക്കുട മണ്ഡലം കമ്മിറ്റി പ്രതിഷേധിച്ചു.
സംഘ്പരിവാര്‍ അസഹിഷ്ണുതയ്ക്കും വര്‍ഗീയ ഫാസിസത്തിനുമെതിരേ തന്റെ വാക്കുകളിലൂടെ ആശയപ്രചരണം നടത്തുകയും പ്രതിരോധം തീര്‍ക്കുകയും ചെയ്ത തികഞ്ഞ മതേതരവാദിയായിരുന്നു ഗൗരി ലങ്കേഷ്. ജാതി മത വര്‍ഗീയ ശക്തികള്‍ക്കെതിരെ വിട്ടുവീഴ്ചയില്ലാത്ത നിലപാട് സ്വീകരിച്ചതിന്റെ പേരിലാണ് ഗൗരി ലങ്കേഷ് അസഹിഷ്ണുതയുടെ ഇരയാകേണ്ടി വന്നത്.
സംഭവത്തില്‍ അപലപിക്കുക പോലും ചെയ്യാത്ത കേന്ദ്ര ഭരണകൂടത്തിന്റേയും പ്രധാനമന്ത്രിയുടേയും നടപടി ദുരൂഹമാണെന്നും ഗൗരിലങ്കേഷിന്റെ കൊലപാതകത്തിനു പിന്നില്‍ പ്രവര്‍ത്തിച്ചവരെ ഉടന്‍ കണ്ടെത്തി അറസ്റ്റു ചെയ്യുവാന്‍ കര്‍ണാടക സര്‍ക്കാര്‍ തയാറാകണമെന്നും സംഘ്പരിവാര്‍ ഭീകരതയെയും വര്‍ഗീയ ഫാസിസത്തേയും ചെറുക്കാന്‍ എല്ലാ മതേതര കക്ഷികളും മുന്നോട്ട് വരണമെന്ന് എ.ഐ.വൈ.എഫ് ഇരിങ്ങാലക്കുട മണ്ഡലം കമ്മിറ്റി അഭ്യര്‍ഥിച്ചു.
പ്രതിഷേധ ജ്വാല സി.പി.ഐ മണ്ഡലം സെക്രട്ടറി പി.മണി ഉദ്ഘാടനം ചെയ്തു. എ.ഐ.വൈ.എഫ് മണ്ഡലം പ്രസിഡന്റ് എ.എസ് ബിനോയ് അധ്യക്ഷനായി. എ.ഐ.വൈ.എഫ് സംസ്ഥാന കമ്മിറ്റി അംഗം കെ.സി ബിജു, വി.ആര്‍ രമേഷ്, ടി.കെ സതീഷ് സംസാരിച്ചു.

മണലൂര്‍: ഗൗരി ലങ്കേഷിനെ കൊലപെടുത്തിയ സംഘ് പരിവാര്‍ ഫാസിസത്തിനെതിരേ കാഞ്ഞാണിയില്‍ പ്രതിഷേധ സായാഹ്നം നടന്നു. പുരോഗമന കലാസാഹിത്യസംഘം അന്തിക്കാട് മേഖല കമ്മിറ്റി, ഡി.വൈ.എഫ്.ഐ മണലൂര്‍ ബ്ലോക്ക് കമ്മിറ്റി, അന്തിക്കാട് പ്രസ് ക്ലബ്ബ് എന്നിവയുടെ സംയുക്താഭിമുഖ്യത്തില്‍ നടന്ന പ്രതിഷേധ സായാഹ്നം കഥാകൃത്ത് അശോകന്‍ ചരുവില്‍ ഉദ്ഘാടനം ചെയ്തു.
എ.വി ശ്രീവത്സന്‍ അധ്യക്ഷനായി. സാഹിത്യകാരന്‍ ജംഷിദ് അലി മുഖ്യ പ്രഭാഷണം നടത്തി. കവി രാവുണ്ണി, ഡി.വൈ.എഫ്.ഐ ബ്ലോക്ക് കമ്മിറ്റി പ്രസിഡന്റ് വി.വി പ്രഭാത്, സെക്രട്ടറി എ.കെ അഭിലാഷ്, ട്രഷറര്‍ ആഷിക്ക് വലിയകത്ത്, മാധ്യമ പ്രവര്‍ത്തകരായ സജിത്ത് പാണ്ടാരിക്കല്‍, അബ്ബാസ് അന്തിക്കാട് സംസാരിച്ചു.

കയ്പമംഗലം: പ്രമുഖ മാധ്യമ പ്രവര്‍ത്തക ഗൗരി ലങ്കേഷിന്റെ കൊലപാതകത്തില് പ്രതിഷേധിച്ച് യൂത്ത് കോണ്‍ഗ്രസ് കയ്പമംഗലം നിയോജക മണ്ഡലം കമ്മിറ്റിയുടെ നേതൃത്വത്തില്‍ പ്രതിരോധ കൂട്ടായ്മ സംഘടിപ്പിച്ചു. മതിലകം സെന്ററില്‍നടന്ന കൂട്ടായ്മ പ്രമുഖ സാമൂഹ്യ പ്രവര്‍ത്തക ബല്‍ക്കീസ് ബാനു ഉദ്ഘാടനം ചെയ്തു. പുരോഗമന ആശയങ്ങള്‍ക്കും പത്ര സ്വാതന്ത്ര്യത്തിനും വേണ്ടി ഉറച്ച നിലപാടെടുത്ത ഗൗരി ലങ്കേഷിനെ നിശബ്ദയാക്കിയത് ഇന്ത്യന്‍ ജനതക്ക് തീരാ കളങ്കമാണെന്ന് അവര്‍ അഭിപ്രായപ്പെട്ടു. യൂത്ത്‌കോണ്‍ഗ്രസ് നിയോജക മണ്ഡലം പ്രസിഡന്റ് ടി.കെ നസീര്‍ അധ്യക്ഷനായി. സി.എസ് രവീന്ദ്രന്‍, ഒ.എ ജെന്‍ട്രിന്‍, ജോസ് മാസ്റ്റര്‍, എ.കെ ഭരതന്‍, വി.എസ് ജിനേഷ്, എന്‍.എസ് സലീമുദ്ദീന്‍, കെ.കെ ഷാജഹാന്‍, കെ.കെ അന്‍വര്‍, റാഫി മതിലകം, കെ.ജെ ജോഷി, സലാം കുഴുപ്പുള്ളി സംസാരിച്ചു.

കടപ്പുറം: വര്‍ഗീയ ഫാസിസത്തിനെതിരേ കെട്ടകാലത്തിന്റെ വെളിച്ചമാവുക എന്ന മുദ്രാവാക്യം ഉയര്‍ത്തി ഡി.വൈ.എഫ്.ഐ കടപ്പുറം മേഖല കമ്മിറ്റി സംഘടിച്ചിച്ച പ്രതിഷേ ജ്വാല സി.പി.എം കമ്മിറ്റി സെക്രട്ടറി വി അഷ്‌റഫ് ഉദ്ഘാടനം ചെയ്തു. സി.എസ് ഷിജിത്ത് അധ്യക്ഷനായി. പി.കെ മുഹമ്മദ് നസീര്‍, പി.എ സിദ്ദി, എന്‍.എ റിജാസ്, എ ഹസീബ് സംസാരിച്ചു.