കോഴിക്കോട്: 1977 ജനുവരി ഒന്നിനു മുന്‍പുള്ള വനഭൂമി കൈയേറ്റങ്ങള്‍ നിയമവിധേയമാക്കുന്നതിന്റെ ഭാഗമായി ജില്ലയില്‍ വനം വകുപ്പുമായി തര്‍ക്കത്തിലിരിക്കുന്ന 61 ഭൂമികളുടെ സര്‍വേ നടപടികളും സംയുക്ത പരിശോധനയും ഡിസംബര്‍ 31നകം പൂര്‍ത്തിയാക്കാന്‍ ഇതു സംബന്ധിച്ച് കലക്ടറേറ്റില്‍ ചേര്‍ന്ന യോഗത്തില്‍ തീരുമാനം. ഇവയില്‍ എട്ടു കേസുകള്‍ ഇതിനകം പരിഹരിക്കുകയും ആറു കേസുകളുടെ സര്‍വേ പൂര്‍ത്തിയാകുകയും ചെയ്തതാണ്. അവശേഷിക്കുന്ന 47 എണ്ണത്തിന്റെ സര്‍വേയും വനം-റവന്യൂ വകുപ്പുകളുടെ സംയുക്ത പരിശോധനയുമാണ് ഇനി പൂര്‍ത്തിയാക്കാനുള്ളത്.
പരിശോധന സമയബന്ധിതമായി പൂര്‍ത്തിയാക്കാന്‍ വനം-റവന്യു- സര്‍വേ വകുപ്പുകളുടെ ഏകോപനം ഉറപ്പുവരുത്തും. യോഗത്തില്‍ എ.ഡി.എം ടി. ജനില്‍കുമാര്‍ അധ്യക്ഷനായി. പുരുഷന്‍ കടലുണ്ടി എം.എല്‍.എ, ഡി.എഫ്.ഒ സുനില്‍കുമാര്‍, എല്‍.ആര്‍ ഡെപ്യൂട്ടി കലക്ടര്‍, വനം- റവന്യൂ-സര്‍വേ വകുപ്പ് ഉദ്യോഗസ്ഥര്‍, രാഷ്ട്രീയ പാര്‍ട്ടി-കര്‍ഷക പ്രതിനിധികള്‍ പങ്കെടുത്തു.