മാനന്തവാടി: ജില്ലയിലെ മുഴുവന്‍ എക്‌സൈസ് സി.ഐമാരെയും മാറ്റി നിയമിച്ചുകൊണ്ട് ഉത്തരവായി. എക്‌സ്.ഡി 3 218616 നമ്പര്‍ ഉത്തരവ് പ്രകാരം സംസ്ഥാനത്താകെ 82 സീനിയര്‍ എക്‌സൈസ് ഇന്‍സ്‌പെക്ടര്‍മാരെ സ്ഥലം മാറ്റിക്കൊണ്ടാണ് കമ്മിഷണര്‍ ഉത്തരവിറക്കിയത്.
ജില്ലയിലെ ഏക ജനമൈത്രി യൂനിറ്റായ മാനന്തവാടി യൂനിറ്റിലെ സി.ഐ കെ.എം ഷാജിയെ ഇടുക്കി ഡിവിഷനിലേക്ക് മാറ്റിയപ്പോള്‍ എറണാകുളത്തു നിന്നും അഗസ്റ്റിന്‍ ജോസഫിനെ മാനന്തവാടി യൂനിറ്റില്‍ നിയമിച്ചു. കല്‍പ്പറ്റ സര്‍ക്കിളില്‍ അശോകനെ ചേര്‍ത്തലയിലേക്ക് മാറ്റിയപ്പോള്‍ കെ.പി ജെയിംസിനെ കല്‍പ്പറ്റയില്‍ നിയമിച്ചു.
മാനന്തവാടി സി.ഐ വൈ. ഷിബുവിനെ തിരുവനന്തപുരം സ്‌ക്വാഡില്‍ നിയമിച്ചപ്പോള്‍ കുന്നത്തൂരില്‍ നിന്നും ആര്‍. ബാബു കുമാറിനെ മാനന്തവാടിയില്‍ നിയമിച്ചു. മുത്തങ്ങ ചെക്ക് പോസ്റ്റ് സി.കെ ടോമി ജേക്കബിനെ ഇടുക്കി കെ.എസ്.ബി.സിയിലേക്ക് മാറ്റി. ഉദ്യോഗ കയറ്റം ലഭിച്ച കെ.എസ് സുരേഷിനെ മുത്തങ്ങയില്‍ നിയമിച്ചു . ബത്തേരിയില്‍ നിന്നും താജുദ്ദീന്‍ കുട്ടിയെ കൊല്ലം സ്‌ക്വാഡിലേക്ക് മാറ്റി. തൃപ്പൂണിത്തറ കെ.എസ്.ബി.സിയില്‍ നിന്നും ജോസ് മാത്യുവിനെ ബത്തേരിയില്‍ നിയമിച്ചു.
 മീനങ്ങാടി ഡിവിഷനില്‍ നിന്നും എസ് ഷാനവാസിനെ ആര്യങ്കാവ് ചെക്ക് പോസ്റ്റിലേക്ക് നിയമിച്ചു. കാഞ്ഞങ്ങാട് നിന്നും കെ.എസ് ഷാജിയെ മീനങ്ങാടിയില്‍ നിയമിച്ചു. എക്‌സൈസ് സബ് ഇന്‍സ്‌പെക്ടര്‍മാരുടെ സ്ഥലംമാറ്റ ഉത്തരവും അടുത്ത ദിവസങ്ങളില്‍ പുറത്തിറങ്ങും.