മൂവാറ്റുപുഴ: വിവിധ മോഷണ കേസുകളിലുള്‍പ്പെട്ട അഞ്ചംഗ സംഘത്തെ മൂവാറ്റുപുഴ പൊലിസ് അറസ്റ്റ് ചെയ്തു. തൊടുപുഴ ഒളമറ്റം ആനിക്കാട്ടില്‍ കൊതുക് രതീഷ് എന്ന് വിളിക്കുന്ന രതീഷ്(36) കല്ലൂര്‍ക്കാട് കിളിവള്ളിക്കല്‍ ആഷിന്‍ ഷാജി(33) വാഴക്കുളം മടക്കത്താനം വടക്കേക്കര ലിബിന്‍(29) വെള്ളിയാമറ്റം ഇളംദേശം സ്വദേശിയായ പാല പൂവരണിയില്‍ താമസിക്കുന്ന കാഞ്ഞിരത്തിങ്കല്‍ ജിജോ(30) ഐരാപുരം മഴുവന്നൂര്‍ വാരിക്കാട്ട് പങ്കന്‍ ഷിജു എന്ന് വിളിക്കുന്ന ഷിജു(36) എന്നിവരാണ് അറസ്റ്റിലായത്.
കേരളത്തില്‍ വിവിധ പ്രദേശങ്ങളിലും, എറണാകുളം ജില്ലയിലെ വിവിധ സ്ഥലങ്ങളിലും റബ്ബര്‍ ഷീറ്റ്, ജാതിക്ക, അടക്ക, വാഹനങ്ങള്‍, പാര്‍ക്ക് ചെയ്ത വാഹനങ്ങളിലെ ഡിസല്‍ എന്നിവ മോഷ്ടിക്കുന്ന സംഘമാണ് ഇവരെന്ന് പൊലിസ് പറഞ്ഞു. ആഢംബര കാറുകള്‍ മറ്റ് വാഹനങ്ങള്‍ എന്നിവ വാടകയ്ക്ക് എടുത്ത് രാത്രി സഞ്ചരിച്ച് മുന്‍കൂട്ടി കണ്ട് വച്ച വീടുകളിലും, സ്ഥാപനങ്ങളിലും മോഷണം നടത്തുകയാണ് പതിവ്.
മൂവാറ്റുപുഴ കുന്നയ്ക്കാല്‍ പാലനാട്ടികവലയില്‍ റബ്ബര്‍ കട കുത്തി തുറന്ന് 400കിലോ റബ്ബര്‍ഷീറ്റും, സമീപത്തുള്ള ജോര്‍ജിന്റെ വീട്ടില്‍ നിന്നും 40കിലോ ജാതിക്കായും, ബധനിപ്പടിയിലെ സാലി ജോസിന്റെ വീട്ടില്‍ നിന്നും ജാതി പത്രിയും, ജാതിക്കായും മോഷ്ടിച്ചിട്ടുണ്ട്.
കുന്നത്തുനാട് പൊലിസ് സ്റ്റേഷനില്‍പെട്ട പള്ളിക്കരയില്‍ റബര്‍ കടയില്‍ നിന്നും 700കിലോ റബ്ബര്‍ ഷീറ്റും, 300കിലോ ജാതിക്കായും, 20കിലോ ജാതി പത്രിയും, നൂറ് കിലോ അടക്കയും, 15000രൂപയും മോഷ്ടിച്ച കേസിലെ പ്രതികളാണ് ഇവരെന്ന് പൊലിസ് പറഞ്ഞു. പട്ടിമറ്റം ഞാറള്ളൂര്‍ ഭാഗത്തുള്ള ഇട്ടൂപ്പിന്റെ പുകപ്പുരയുടെ പൂട്ട് പൊളിച്ച് 200കിലോ റബ്ബര്‍ ഷീറ്റ്, ഐരാപുരം കുന്നകുരുടി ബധനി സ്‌നേഹാലയത്തില്‍ നിന്നും 200റബ്ബര്‍ഷീറ്റും കോലഞ്ചേരി മെഡിക്കല്‍ കോളേജ് ആശുപത്രി പാര്‍ക്കിംഗ് ഗ്രൗണ്ടില്‍ നിന്നും ഗുഡ്‌സ് ഓട്ടോറിക്ഷ മോഷ്ടിച്ച കേസിലും പ്രതികളാണ്.
പ്രതി ജിജോ തൊടുപുഴ, കരിങ്കുന്നം, കാഞ്ഞാര്‍, വാഴക്കുളം, മൂവാറ്റുപുഴ, കരിമണ്ണൂര്‍, ഊന്നുകല്‍, കാലടി, അങ്കമാലി, തിടനാട്, കൊരട്ടി, പാല, എന്നീ പൊലിസ് സ്റ്റേഷനുകളില്‍ മോഷണ കേസുകളും, കഞ്ചാവ് കേസ്, റബ്ബര്‍ ഷീറ്റ് മോഷണം ഉള്‍പ്പടെ 20കേസുകളില്‍ പ്രതിയാണ്. തൊടുപുഴ, വാഴക്കുളം, രാമപുരം തുടങ്ങിയ സ്റ്റേഷനുകളില്‍ റബ്ബര്‍ ഷീറ്റ് മോഷണം, അടിപിടി എന്നീ കേസുകളില്‍ ലിബിന്‍ പ്രതിയാണ്.
ആഷിന്‍ ഷാജിയ്ക്ക് രാമപുരം, കാഞ്ഞാര്‍, തൊടുപുഴ, കൂത്താട്ടുകുളം സ്റ്റേഷനുകളില്‍ 11മോഷണ കേസും, കഞ്ചാവ് കേസുമുണ്ട്. കല്ലൂര്‍ക്കാട് , കോതമംഗലം, ചങ്ങനാശ്ശേരി, ഈരാറ്റുപേട്ട, പുത്തന്‍കുരിശ്, സ്റ്റേഷനുകളില്‍ റബ്ബര്‍ ഷീറ്റ് മോഷണം, കഞ്ചാവ് കേസ്, അടിപിടി കേസിലും പ്രതിയാണ് പങ്കന്‍ ഷിബു. തൊടുപുഴ, വാഴക്കുളം, കല്ലൂര്‍ക്കാട്, പോത്താനിക്കാട്, സ്റ്റേഷനുകളില്‍ അഞ്ച് റബ്ബര്‍ഷീറ്റ് മോഷണ കേസും ചെക്ക് കേസുകളിലും പ്രതിയാണ് കൊതുക് രതീഷ്. മോഷണം നടത്തി കിട്ടുന്ന സാധനങ്ങള്‍ കടത്തികൊണ്ട് പോയി വില്‍ക്കുകയാണ് സംഘത്തിന്റെ രീതി.
നിയമ വിരുദ്ധവും കൃത്യമായ ലൈസന്‍സില്ലാതെയും പ്രവര്‍ത്തിക്കുന്ന സ്ഥാപനങ്ങളും വ്യക്തികളും വാടകയ്ക്ക് നല്‍കുന്ന വാഹനങ്ങള്‍ ഉപയോഗിച്ച് മോഷണങ്ങള്‍ നടത്തുകയും ഇതേ വാഹനങ്ങള്‍ പൊളിച്ച് വില്‍ക്കുന്നതായും, പണയപ്പെടുത്തുന്നതായും ശ്രദ്ധയില്‍ പെട്ടിട്ടുണ്ടന്ന് ഡിവൈ.എസ്.പി.കെ.ബിജുമോന്‍ പറഞ്ഞു. ഇത്തരം ഇടപാടുകള്‍ സംമ്പന്ധിച്ച് അന്വോഷണം നടത്തി ലൈസന്‍സില്ലാതെ വാടകയ്ക്ക് വാഹനങ്ങള്‍ നല്‍കുന്നവരെ കേസുകളില്‍ കൂട്ടുപ്രതിയാക്കുന്നതിനും നിയമ നടപടിയെടുക്കുമെന്നും ഡി.വൈ.എസ്.പി.അറിയിച്ചു.