ആലക്കോട്: ഫാ. ടോം ഉഴുന്നാലിന്റെ മോചന വാര്‍ത്ത വന്നതോടെ ഏറെ സന്തോഷത്തിലാണ് ആലക്കോട്ടെ ഉഴുന്നാലില്‍ ഡോളിയും കുടുംബവും. ജ്യേഷ്ഠ സഹോദരന്റെ പുത്രന്‍ കൂടിയായ ഫാ. ഉഴുന്നാലുമായി വളരെ അടുത്ത സൗഹൃദത്തിനുടമ കൂടിയാണ് ഡോളി. ചൊവ്വാഴ്ച ഉച്ചയോടെയാണ് ടോം ഉഴുന്നാലിന്റെ മോചനവാര്‍ത്ത ദൃശ്യമാധ്യമങ്ങളില്‍ കൂടി ഡോളി അറിയുന്നത്. വാര്‍ത്ത അറിഞ്ഞയുടനെ മറ്റു ബന്ധുക്കളെ ഫോണില്‍ വിളിച്ച് സന്തോഷം പങ്കുവച്ചു.
40 വര്‍ഷം മുമ്പ് രാമപുരത്തു നിന്നു മലബാറിലേക്ക് കുടിയേറിയതാണെങ്കിലും രണ്ടു മാസം മുമ്പ് വരെ ഫാദര്‍ ഉഴുന്നാലിന്റെ വീട്ടില്‍ ഇവര്‍ എത്തിയിരുന്നു. ഫാദറിനെ കാണാതായ ദിവസം മുതല്‍ പ്രാര്‍ഥനയിലായിരുന്നു ഡോളിയും കുടുംബവും. വാര്‍ത്ത അറിഞ്ഞയുടനെ സന്തോഷവും സങ്കടവും ഒരുമിച്ചു വന്നെന്ന് ഡോളി പറയുന്നു.
ഡോളിയുടെ മൂത്ത സഹോദരന്‍ ഫാ. മാത്യു ഉഴുന്നാലില്‍ യമനില്‍ 19 വര്‍ഷം ജോലി ചെയ്തിരുന്നു. ഫാ. മാത്യുവിന്റെ മരണ ശേഷമാണ് ഫാ. ടോം ഉഴുന്നാലില്‍ യമനിലേക്ക് പോയതെന്നും ഇവര്‍ ഓര്‍ത്തെടുക്കുന്നു.
മോചനത്തിന് വേണ്ടി പ്രവര്‍ത്തിച്ച മുഴുവനാളുകള്‍ക്കും ഭരണകൂടത്തിനും ദൈവത്തിനും നന്ദി പറഞ്ഞാണ് ഡോളി സന്തോഷത്തില്‍ പങ്കുചേര്‍ന്നത്.