കൊച്ചി: ലോക സീനിയര്‍ ബാഡ്മിന്റണ്‍ ചാംപ്യന്‍ഷിപ്പില്‍ ഇന്ത്യയുടെ നിഖില്‍ കനേത്കര്‍ ക്വാര്‍ട്ടര്‍ ഫൈനലില്‍ കടന്നു. 35 വയസിന് മുകളിലുള്ളവരുടെ വിഭാഗത്തിലെ പ്രീ ക്വാര്‍ട്ടറില്‍ സ്വിറ്റ്‌സര്‍ലാന്‍ഡിന്റെ ഒലിവര്‍ കോളിനെയാണ് നിഖില്‍ പരാജയപ്പെടുത്തിയത്. സ്‌കോര്‍: 21-17, 21-18. ജര്‍മനിയുടെ ഹെന്‍ഡ്രിക് വെസ്റ്റെര്‍മേയറാണ് ക്വാര്‍ട്ടര്‍ ഫൈനലില്‍ നിഖിലിന്റെ എതിരാളി. 2004 ലെ ഒളിംപിക്‌സില്‍ ഇന്ത്യയെ പ്രതിനിധീകരിച്ച് പങ്കെടുത്ത നിഖില്‍ ഏഴ് വര്‍ഷത്തിന് ശേഷമാണ് രാജ്യാന്തര മത്സരത്തില്‍ പങ്കെടുക്കുന്നത്. ക്വാര്‍ട്ടറില്‍ വിജയിച്ച് ഒരു മെഡല്‍ ഉറപ്പിക്കാനാകുമെന്നാണ് പ്രതീക്ഷയെന്ന് മത്സര ശേഷം അദ്ദേഹം പറഞ്ഞു. ഇതേ വിഭാഗത്തിലെ മറ്റൊരു മത്സരത്തില്‍ ഇന്ത്യയുടെ അബിന്‍ ശ്യാം ഗുപ്ത ഹംഗറിയുടെ ക്രിസ്റ്റോഫ് ഹൊര്‍വാത്തിനെ 21-18, 21-19 എന്ന സ്‌കോറിന് തോല്‍പിച്ചു. അടുത്ത റൗണ്ടില്‍ ടോപ് സീഡും നിലവിലെ ചാംപ്യനുമായ റഷ്യയുടെ സ്റ്റാന്‍സ്ലാവ് പുകോവാണ് എബിന്‍ ശ്യാമിന്റെ എതിരാളി.