നെടുമ്പാശ്ശേരി: കുറുമശ്ശേരിയില്‍ വ്യാപാര സ്ഥാപനങ്ങള്‍ കേന്ദ്രീകരിച്ച് മോഷണം വ്യാപകമാകുന്നു.കഴിഞ്ഞ രാത്രിയിലും മോഷണം നടന്നു. മലഞ്ചരക്ക് കട കുത്തിതുറന്ന് ജാതിപത്രിയും ജാതി പരിപ്പും മോഷ്ടിച്ചു. തിരുവോണത്തിന് കുറുമശേരിയിലെ നാല് കടകള്‍ കുത്തിതുറന്ന് കവര്‍ച്ച നടത്തിയിരുന്നു. മുന്‍പും പല പ്രാവശ്യം കടകള്‍ കുത്തിതുറന്ന് മോഷണം നടന്നിട്ടുണ്ട്. ഇതേതുടര്‍ന്ന് വ്യാപാരികള്‍ ചെങ്ങമനാട് പൊലിസില്‍ പരാതി നല്‍കിയതിനെ തുടര്‍ന്ന് പൊലിസ് നൈറ്റ് പട്രോളിംഗ് ഊര്‍ജിതമാക്കാമെന്ന് ഉറപ്പു നല്‍കിയിരുന്നു.
ഇതിനിടയിലാണ് വീണ്ടും മോഷണം നടന്നത്. കുറുമശേരി ജങ്ഷനില്‍ സി.സി ടി.വി കാമറ സ്ഥാപിക്കണമെന്ന് വ്യാപാരികള്‍ പലവട്ടം ആവശ്യപ്പെട്ടെങ്കിലും നടപടിയൊന്നുമുണ്ടായിട്ടില്ലെന്ന് വ്യാപാരികള്‍ കുറ്റപ്പെടുത്തുന്നു.