അട്ടപ്പാടി: കനത്ത മഴയെ തുടര്‍ന്നുണ്ടായ വെള്ളക്കെട്ടില്‍ വീണ് മൂന്നാം ക്ലാസുകാരി മരിച്ചു. അട്ടപ്പാടി സ്വദേശി ആതിരയാണ് മരിച്ചത്. വീടിനു സമീപത്ത് കക്കൂസിനായി നിര്‍മിച്ച കുഴിയില്‍ കനത്ത മഴയെ തുടര്‍ന്ന് വെള്ളം നിറഞ്ഞിരുന്നു. ഇതില്‍ കാല്‍വഴുതി വീണാണ് കുട്ടി മരിച്ചത്.

സംസ്ഥാനത്ത് തുടരുന്ന കനത്ത മഴയില്‍ ജനജീവിതം പലയിടത്തും ദുസ്സഹമായിരിക്കുകയാണ്. പലയിടത്തും വ്യാപക നാശനഷ്ടങ്ങളുണ്ടായി. അട്ടപ്പാടിയില്‍ ഉരുള്‍പൊട്ടലിനെ തുടര്‍ന്ന് കനത്ത നാശനഷ്ടങ്ങള്‍ റിപ്പോര്‍ട്ട് ചെയ്തിട്ടുണ്ട്. പാലക്കാട് അട്ടപ്പാടി ആനക്കല്ലിലും ജെല്ലിപാറയിലുമാണ് ഉരുള്‍പൊട്ടിയത്. വീടുകള്‍ ഭാഗികമായി തകര്‍ന്നിട്ടുണ്ട്. കൃഷിയിടങ്ങള്‍ ഒലിച്ചുപോയി. ഉരുള്‍പൊട്ടലിന് സമാനമായ മലവെള്ളപ്പാച്ചിലും പലയിടത്തുണ്ടായിട്ടുണ്ട്.

അതേസമയം വരുംദിവസങ്ങളിലും സംസ്ഥാനത്ത് കനത്ത മഴ തുടരുമെന്നാണ് കലാവസ്ഥാ നിരീക്ഷകരുടെ പ്രവചനം.