ഇസ്‌ലാമാബാദ്: ലാഹോറിലെ എന്‍.എ 120 മണ്ഡലത്തില്‍ ഇന്നലെ നടന്ന ഉപതെരഞ്ഞെടുപ്പില്‍ പാകിസ്താന്‍ മുസ്‌ലിം ലീഗ് (പി.എം.എല്‍.എന്‍) നവാസ് ലീഡ് ചെയ്യുന്നതായി റിപ്പോര്‍ട്ട്.
അനൗദ്യോഗിക റിപ്പോര്‍ട്ടുകളുടെ അടിസ്ഥാനത്തില്‍ ജിയോ ന്യൂസാണ് റിപ്പോര്‍ട്ട് പുറത്തുവിട്ടത്. രാത്രി വൈകിയും വോട്ടെടുപ്പ് തുടരുന്നതിനാല്‍ തെരഞ്ഞെടുപ്പ് ഫലം പൂര്‍ണമായി ലഭ്യമായില്ല. ഷരീഫിന്റെ ഭാര്യ കുല്‍സൂം നവാസാണ് പി.എം.എല്‍.എന്‍ സ്ഥാനാര്‍ഥി.
പാക് തഹ്‌രീകെ ഇന്‍സാഫ് പാര്‍ട്ടിയുടെ ഡോ. യാസ്മീന്‍ റഷീദാണ് എതിര്‍സ്ഥാനാര്‍ഥി. ഇന്നലെ നടന്ന തെരഞ്ഞെടുപ്പില്‍ 220 പോളിങ് സ്റ്റേഷനുകളിലാണ് വോട്ടെടുപ്പ് നടന്നത്.
രാവിലെ എട്ടുമുതല്‍ ആരംഭിച്ച ഉപതെരഞ്ഞെടുപ്പില്‍ വന്‍ തിരക്കാണ് അനുഭവപ്പെട്ടത്. വോട്ട് ചെയ്യാനുള്ള അവസാന സമയമായ അഞ്ചുമണി കഴിഞ്ഞിട്ടും വോട്ടര്‍മാര്‍ പോളിങ് ബൂത്തില്‍ വോട്ടുചെയ്യാന്‍ കാത്തുനിന്നതായും ജിയോ ന്യൂസ് റിപ്പോര്‍ട്ട് ചെയ്യുന്നു.
വോട്ടെടുപ്പ് നടക്കുന്ന പ്രദേശങ്ങളില്‍ ശക്തമായ സുരക്ഷയാണ് സര്‍ക്കാര്‍ ഏര്‍പ്പെടുത്തിയിരിക്കുന്നത്. അനിഷ്ട സംഭവങ്ങളൊന്നും റിപ്പോര്‍ട്ട് ചെയ്തിട്ടില്ല.
321,786 വോട്ടര്‍മാരുള്ള എന്‍.എ 120 മണ്ഡലത്തില്‍ 350,000 ബാലറ്റ് പേപ്പറുകളാണ് വിതരണം നടത്തിയതെന്ന് പാക് ഇലക്ഷന്‍ കമ്മിഷന്‍ അറിയിച്ചു.