തൃക്കരിപ്പൂര്‍: യുവാവിനെ വെട്ടിക്കൊലപ്പെടുത്താന്‍ ശ്രമിച്ച കേസില്‍ ഒളിവില്‍ കഴിയുകയായിരുന്ന ആറുപേരെ ചന്തേര പൊലിസ് പിടികൂടി. പാലക്കാട് ജില്ലയിലെ ചിറ്റൂര്‍ പൊലിസ് സ്‌റ്റേഷന്‍ പരിധിയിലെ കൊടുപുള്ളി സ്വദേശി അനില്‍കുമാറിനെ വെട്ടിക്കൊലപ്പെടുത്താന്‍ ശ്രമിച്ച സംഭവത്തില്‍ കാസര്‍കോട് ജില്ലയിലെ തൃക്കരിപ്പൂര്‍ കുറ്റിച്ചിയില്‍ ഒളിവില്‍ കഴിയുകയായിരുന്ന കൊടുപുള്ളി സ്വദേശികളായ എ. പ്രദീപന്‍ (20), എം. രതീഷ് (26), സുമന്‍ (23), ടി.അനീഷ് (28), രമേഷ് (23), സുധീഷ് (28) എന്നിവരെയാണ് ചന്തേര പൊലിസ് പിടികൂടിയത്.
ഇവര്‍ കുറ്റിച്ചിയിലെ ഒരു വീട്ടില്‍ ഒളിവില്‍ കഴിയുകയാണെന്ന രഹസ്യ വിവരത്തെ തുടര്‍ന്ന് പൊലിസ് സംഘം വീടുവളഞ്ഞാണ് പ്രതികളെ പിടികൂടിയത്. ആറുപേരെയും ഇന്നലെ വൈകിട്ടോടെ ചിറ്റൂര്‍ പൊലിസിന് കൈമാറി.