കണ്ണൂര്‍: അഴീക്കോട് എം.എല്‍.എയും മുസ്‌ലിം ലീഗ് നേതാവുമായ കെ.എം ഷാജിക്കെതിരേ സോഷ്യല്‍ മീഡിയയിലൂടെയും വാര്‍ത്താ മാധ്യമങ്ങളിലൂടെയും ചില താല്‍പര കക്ഷികള്‍ നടത്തിക്കൊണ്ടിരിക്കുന്ന വാസ്തവവിരുദ്ധമായ കുപ്രചാരണങ്ങളെ അവജ്ഞയോടെ തള്ളിക്കളയണമെന്ന് ജില്ലാ മുസ്‌ലിം ലീഗ് പ്രസിഡന്റ് പി. കുഞ്ഞിമുഹമ്മദും ജനറല്‍ സെക്രട്ടറി അഡ്വ. അബ്ദുല്‍ കരീംചേലേരിയും പറഞ്ഞു. എം.എല്‍.എയെ പൊതുജനമധ്യത്തില്‍ താറടിച്ചു കാണിക്കാനുള്ള കുത്സിത ശ്രമങ്ങളാണ് നടന്നുകൊണ്ടിരിക്കുന്നത്. ഇതില്‍ പൊതുജനങ്ങളും പാര്‍ട്ടി പ്രവര്‍ത്തകരും വഞ്ചിതരാകരുത്. എം.എല്‍.എക്കെതിരായി ഉയര്‍ന്നുവന്ന തെറ്റായ ആരോപണങ്ങള്‍ക്ക് അദ്ദേഹം തന്നെ കൃത്യമായ മറുപടി നല്‍കിയിട്ടുണ്ട്. നിയമസഭാ തെരഞ്ഞെടുപ്പ് കഴിഞ്ഞ് ഒന്നരവര്‍ഷം പിന്നിടുമ്പോഴും പാര്‍ട്ടിയുടെ ഉത്തരവാദിത്തപ്പെട്ട ഒരു സമിതിയിലും ഉന്നയിക്കാത്ത ആരോപണം പാര്‍ട്ടിയില്‍ നിന്ന് പുറത്താക്കപ്പെട്ടതിന് ശേഷം വാര്‍ത്താമാധ്യമങ്ങളെ ഉപയോഗപ്പെടുത്തി ഉയര്‍ത്തിക്കൊണ്ടുവരുന്നതിന് പിന്നിലുള്ള ലക്ഷ്യവും ദുഷ്ടലാക്കും ജനങ്ങള്‍ തിരിച്ചറിയുക തന്നെ ചെയ്യുമെന്നും അവര്‍ പറഞ്ഞു.